Ekipa Selesaun Nasionál Timor-Leste U-23. imajen/Hortencio Sanchez

VIETNAME, 07 maiu 2022 (TATOLI) – Treinadór Prinsipál Selesaun U-23 Timor-Leste, Fabio Maciel da Silva, informa jogadór na’in-tolu no ofisiál ne’ebé pozitivu COVID-19 hahú rekuperadu ona no halo ona viajen hosi Malázia bá Vietname  hodi partisipa jogu aban (08/05).

“Jogadór na’in-tolu hanesan Dom Braz, Anizio Correia, Jonzinho Mendonça no asistente treinadór João Paulo sei mai Vietname, ohin (07/05) too ona iha Vietname tanba sira tuir ona teste ho rezultadu negativu COVID-19, sira mai atu hamutuk ho ekipa ba jogu aban nian,” Treinadór ne’e hateten  ba Agência TATOLI iha Vietname, sábadu ne’e.

Notísia relevante: COVID-19 afeta ba selesaun nasionál U-23 iha jogu SEA Games

Enkuantu, jogadór na’in-rua mak nafatin hela iha Malázia hodi hein billete atu fila hikas ba Timor-Leste iha tempu besik tanba hetan aleiza.

“Sira na’in-rua mak labele mai, ida mak João Soares no Natalino Nunes Soares tanba aleiza hela iha nia ain,” nia afirma.

Iha biban hanesan, Médiku Jerál Servisu iha Hospital Nasionál Guido Valadares (HNGV), liuhosi Departementu Banku Urjénsia ne’ebé apoia selesaun nasionál U-23 iha SEA Games Vietname, Eldegar Lopes Martins, hateten jogadór na’in-tolu no ofisiál na’in-ida ne’ebé atu mai ne’e hetan ona autorizasaun hosi ofisiál saúde Malázia nian.

“Sira na’in hira iha Malázia atu mai ne’e loos ona tanba teste ba sira negativu ona, entaun ofisiál saúde Malázia autoriza ona sira mai Vietname hodi partisipa jogu aban,” nia dehan

Enkuantu, Ofisiál Julião Monteiro no jogadór João Bosco Hale mak sei iha prosesu nia-laran tanba Doutór sira iha Vietname halo ona teste ba sira no rezultadu sei rona iha orsida bainhira negativu bele hala’o ona atividade.

Doutór ne’e mós esplika kona-ba jogadór sira ne’ebé horisehik joga maioria kondisaun di’ak hotu, maibé jogadór Gustavo Eta mak hetan pankada hosi ain no daudaun ne’e halo hela tratamentu, maibé posibilidade aban nia sei bele joga kontra Myanmar.

Notísia relevante: Jogadór na’in-neen pozitivu COVID-19, TL derrota kontra Filipina 0-4

Jornalista: Hortencio Sanchez

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here