Jogu dahuluk iha SEA Games entre Filipina ho Timor-Leste ho rezultadu eskore 4-0. Imajen/espesial

VIETNAME, 06 maiu 2022 (TATOLI)– Ekipa selesaun nasionál U-23 Timor-Leste ho naran istimadu “Lafaek”, sesta ne’e, derrota kontra adversáriu Filipina ho eskore 0-4, iha jogu dahuluk SEA Games iha Vietname.

Ekipa Timor-Leste obrigadu tenke derrota duni tanba maioria jogadór importante balun pozitivu COVID-19 hodi la partisipa jogu ne’e.

Jogadór ne’ebé daudaun ne’e pozitivu hela no la tuir jogu dahuluk na’in-neen kompostu, Anizio Correia, Dom Lucas Braz, Natalino Nunes Soares, João Soares, Jonzinho Mendonça no João Bosco Hale. Enkuantu ofisiál Julião Monteiro no João Paulo mak hetan pozitivu Covid-19.

Nune’e, iha minutu dahuluk hahú ekipa rua lansa kedan kontra no atake ba malu tuir tékniku no abilidade ekipa ida-idak nian ho ambisaun ne’ebé makas atu prodús golu.

Timor-Leste hala’o jogu ho modelu defensive ka jogu badak ne’ebé pasa bola hosi ain ba ain bainhira hetan oportunidade mak foin ezekuta nia finalidade.

Maibé, Filipina hala’o jogu ho modelu ofensivu no kontra no atake ne’ebé makas halo jogadór timór-oan sira ne’e kuaze atu book-an la di’ak iha kampu laran.

Ho estratéjia ne’ebé Filipina hala’o la hela de’it hanesan estratéjia tanba iha minutu 10 de’it bola barullu iha liña Timor-Leste no jogadór Cristian Mangaron (18) lansa bola ho ulun ba halo guarda rede Junildo Pereira laiha konsentrasaun no la konsege salva bola ne’e.

Hosi golu ne’e lori Filipina lidera kedan jogu ne’e provizoriamente ho eskore 1-0 iha minute 45.

Maski, ho golu ne’ebé iha ona la hamate espiritu jogadór timoroan hirak ne’e nian atu luta nafatin ho esforsu tomak,  maibé seidauk bele fó golu ba Timor-Leste nune’e rezultadu provizóriu hela ho 1-0.

Dolar ba segunda parte ekipa rua nafatin hatudu jogu ne’ebé di’ak hodi lansa nafatin kontra no atake ba malu tuir tékniku jogu ida-idak nian hodi fó vitória ba sira nia ekipa no nasaun.

Maibé, Filipina halo kontra no atake ne’ebé makas hodi fó presaun ba Timor – Leste iha minute 55, jogadór Filipina Dennis Salazar (7) lansa sutu ho velosidade makas rezulta kedan golu ba Timor-Leste hodi muda rezultadu ba 2-0

Presaun Filipina nian sa’e ba bebeik nune’e iha minutu 77, Jovin Hervas (9) halo tan golu ida hatur rezultadu ba 0-3, Timor -Leste nia jogadór sira falla kedan kontrola tanba rezultadu namlele dook ona ba 0-3.

Treiandór Timor-Leste Fabio Maciel da Silva halo estratéjia oi-oin atu muda jogu, maibé la konsege fera Filipina nia jogu, nune’e iha minutu 80, jogadór Oskari lansa golu ikus hodi hatur metin rezultadu ba 4-0 no too jogu termina vitória hela ba Filipina.

Jornalista: Hortencio Sanchez

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here