Primeiru-Ministru, Taur Matan Ruak, prezide reuniaun Konsellu Ministru. Iha Palásiu Governu, kuarta (04/05). Imajen TATOLI/Francisco Sony

DILI, 06 maiu 2022 (TATOLI)– Governu liuhosi reuniaun Konsellu-Ministru estraordináriu kinta ne’e, aprova ona dekretu lei ida hodi fó subsídiu  fin do ano ho valór $ 200 ba uma-kain sira iha Timor-Leste.

Dekretu lei ne’e aprezenta husi Vise-Primeira-Ministra atuál Ministra Solidariedade Sosiál no Inkluzaun (MSSI), Armanda Berta dos Santos, relasiona ho Apoiu pontuál ba uma-kain sira.

Notísia relevante : Governu aprova medida 13 no sei prosede ba orsamentu retifikativu

“Objetivu husi Dekretu-Lei ida-ne’e atu kria no atu regula prestasaun pagamentu pontuál ida ba uma-kain timoroan sira nian. Pagamantu ne’e sei hanaran subsídiu fim do Ano, no ho valór $200 ba uma-kain idak-idak,” informa Ministru Prezidénsia Konsellu Ministru, Fidelis Manuel Leite Magalhães, hafoin ramata reuniaun ezekutivu, iha Palásiu Governu, Dili.

Governante ne’e dehan, ho medida ne’e governu hakarak fó apoiu ekonómiku ba uma-kain sira iha Timor-Leste. No benefisiáriu sira ne’ebé maka iha diretu atu simu subsídiu ne’e tenke rejista ona iha livru visa família  iha suku idaidak to’o loron 28 fulan-fevereiru 2022.

Entretantu, subsídiu  $200 ne’e nu’udar medida ida hosi medida 13 ne’ebé  maka governu lalais aprova foin no sei finansia hosi Orsamentu Retifikativu (OR), ho montante billaun $1,1 ne’ebé dadaun Parlamentu Nasionál no Governu halo hela audiénsia públika.

Iha tinan 2020, Governu atribui tiha ona subsídiu $200 ba kada uma-kain iha ámbitu Estadu Emerjénsia ligadu ho prevensaun no mitigasaun pandemia COVID-19 iha Timor-Leste.

Jornalista : Antónia Gusmão

Editór       : Agapito dos Santos

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here