BAUCAU, 05 maiu 2022 (TATOLI) – Hafoin eleisaun prezidensiál iha loron 19 abriíl liubá, daudaun ne’e Sekretariadu Tékniku Administrasaun Eleitorál (STAE) hahú hikas atividade resensiamentu eleitorál ba sidadaun hosi idade 17 ba leten iha munisípiu Baucau.
Diretór STAE Baucau, Lúcio Freitas Salvador, esplika, prosesu resensiamentu eleitorál foun no atualiza ba eleitór tuan provizoriumente sei hala’o iha edifísiu STAE munisipiu tanba sei iha faze atividade rútina maibé bainhira programa atividada fó-sai ona hosi nasionál sei halo atividade refere iha postu administrativu sira.
“Agora daudaun ita hahú fali atividade rútina hanesan resensiamentu ba eleitór foun sira no atualiza dadus,” Diretór STAE Baucau hateten iha Vila Nova, kinta ne’e.
Atividade rensensiamentu eleitorál foun no atualiza dadus bazea ba lei númeru 19/2016 tanba resensiamentu eleitorál hanesan ktividade permanente nune’e bainhira remata eleisaun, STAE kontinua atividade rútina resensiamentu eleitór foun.
Kritéria importante rensensiamentu eleitór foun tenke iha deklarasaun hosi suku tanba presiza koñesimentu autoridade suku, kópia no orijinál Billete Identidade(BI), sertidaun RDTL no pasaporte.
Enkuantu ba sira-ne’ebé atualiza hanesan muda diresaun presiza deklarasaun xefe suku tanba parte koñesimentu hosi autoridade lókal kona-ba mudansa hela-fatin inklui identidade pesoál.
Entretantu, dadus hosi STAE Baucau rejista eleitór hamutuk na’in-95.708 hosi sentru votasaun hamutuk 125 no estasaun votu hamutuk 150.
Jornalista : Natalino Belo
Editór : Evaristo Soares Martins
