Diretór Munisipál Konservatóriu Servisu Rejistu Notariadu Munisípiu Bobonaro, João Mau-Pelu. Imajen Tatoli/Sérgio da Cruz.

BOBONARO, 05 maiu 2022 (TATOLI) – Diretór Munisipál Konservatóriu Servisu Rejistu Notariadu (DMCSRN, sigla portugues) Munisípiu Bobonaro, João Mau-Pelu, husu Ministériu Justísa (MJ) solusiona mákina Fargo ne’ebé avaria dezde 2017 to’o agora seidauk rezolve.

Mau-pelu haktuir, iha tinan kotuk dezde mandatu Ministru Justisa sesante, Manuel Cárceres, promote iha tinan ne’e sei distribui mákina imprime Billete Identidade foun ba munisípiu Lospalos no Bobonaro, maibé realidade governante ne’e rejigna-aan de’it.

“Karik Ministru foun iha planu ne’ebé ke di’ak bele rezolve, sé mantein hanesan uluk, ita sei nafatin de’it, entaun ami mós husu oinsá bele trata lalais atu ami bele hetan mákina foun hodi halo atendimentu ba komunidade sira, maibé ami hanesan ema-kiik aprezenta de’it ba leten, solusaun ho desizaun sira mak sei foti,” nia informa ba Tatoli, iha kna’ar-fatin, Maliana, kinta ne’e

Nia akresenta, daudaun ne’e funsionáriu sira kotinua halo atendimentu ba komunidade fó de’it kartaun Billete Identidade provizóriu, uza de’it sura- tahan mutin, maibé nia validade ba to’o munisípiu sira seluk, bainhira hakrak trata dukumentu nesesáriu sira seluk hodi aplika vaga serbisu, eskola, pasaporte no seluk tan.

“Maibé komunidade sira barak mak mai kestiona beibeik, nusá maka la fó Billete Identidade orijinál atu ami bele tau bolsu, agora fó fali HVS naruk ida ami lori la diak,balu udan bele nakles tan”Nia haktuir

Iha fatin hanesan, komunidade Sonia Moniz, reforsa Ministériu Justisa presiza kompra duni mákina ne’e, tanba atu hetan kartaun orijinál komunidade sira tenke ba Dili no munisípiu sira seluk.

Komunidade suku Holsa, postu administrativu Maliana, munisípiu Bobonaro, Sonia Moniz. Imajen Tatoli/Sérgio da Cruz.

“Kuaze komunidade Bobonaro uza de’it provizóriu, ha’u-nia ne’e mai trata dezde 2020 to’o agora nafatin uza surat-tahan, agora ohin ha’u mai husu orijinál ba dehan mákina ladi’ak, sé ida-ne’e mak ami uza beibeik nia bele nakles dodok tán tanba ne’e surat-tahan fasil nakles,” nia hateten.

Enkuantu mákina ne’ebé avaria ne’e governu halo akiiasaun iha 2010 konsege halo opersaun serbisu produsaun Billete Identidade orijinál durante tinan hitu tanba hahú avaria iha 2017.

Iha tinan ne’e hahú hosi janeiru to’o marsu DMCSRN produús ona BI provizóriu hamutuk rihun-rua resin ba komunidade iha postu administrativu, Atabae, Balibo, Cailaco, Maliana, Bobonaro no postu administrativu Lolotoe.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here