Ekipa Jestaun Merkadu husu negosiante labele faan sasán iha trotoar leten iha estrada públiku. Imájen Tatoli//Nelia Fernandes.

DILI, 05 maiu 2022 (TATOLI)—Atu komemora loron restaurasaun independénsia Timor-Leste ba dala-XX (20 maiu 2002-20 maiu 2022), Autoridade Munisípiu Dili liuhosi Dirasaun Jestaun no Merkadu sei hasai obrigatóriu negosiante sira-ne’ebé faan sasán iha trotoar leten no dalan públiku.

“Objetivu ami muda negosiante sira-ne’e, tanba ho komemorasaun ne’e ita-nia parseria Internasionál, Nasaun viziñu liu-liu nasaun komunidade língua portugeza no bainaka sira seluk sei mai. Sira labela haree ita-nia sidade Dili ne’e sai fali sidade vendedór ambulante nian,” Xefe Departamentu Jestaun no Merkadu, Arthur Henriques, hateten ba Ajénsia Taoli, iha nia knar-fatin, kinta ne’e.

Antes hasai negosiante sira faan sasán iha trotoar leten no dalan públiku, Jestaun no Merkadu halo uluk, aproximasaun ho sira, hanesan hakbesik an ko’alia ba sira no mós avizu liuhosi mikrofone maibé negosiante balun iha konsiénsia muda no balun ulun to’os lakohi muda.

“Ba sira-ne’ebé la kumpre mak ami sei foti medida, hanesan ami sei halo apreensaun ba sasán sira-ne’ebé sira faan no sasán sira hanesan meza no kadeira aat sira-ne’e, ami sei hasai no ba so’e iha Tibar,” nia dehan.

Karik sei muda mós negosiante ambulante iha kapitál Dili, nia hatán, vendedór ambulante sira labele muda, tanba sira faan ne’e la permanente hodi faan iha fatin ida mosu iha fatin seluk.

“Hanesan sira-ne’ebé faan ikan iha Largo Lecidere no Pantai Kelapa, ohin no aban, sira faan laiha ona no bainrua faan fali. Ida-ne’e ita atu muda sira ba tan ne’ebé. Tanba, ita muda ona sira mai merkadu Manleuana no Taibesi, maibé sira-ne’e mak sai ba faan tutan fali iha fatin ne’ebá. Tanba, ami koñese didi’ak sira-ne’ebé faan iha estrada ibun,” nia dehan.

Tanba, iha Largo Lecidere no Pantai Kelapa ne’e Jestaun Merkadu bandu ona tanba pesoál Jestaun no Merkadu sempre halo apreensaun ba sira-nia sasán maibé sira mai faan nafatin iha fatin refere.

“Entaun, ho preparasaun ne’e ami sei foti medida ba negosiante sira. Se sira la sai mak ami sei hasai obrigatóriu,” nia dehan.

Daudaune ne’e, ekipa hala’o ona operasaun iha kapitál Dili nia laran, hanesan iha Tasi-Tolu ne’e ekipa Jestaun no Merkadu muda ona negosiante ambulante sira ba iha área tasi-ibun Tasi-Tolu nian.

Operasaun ba negosiante ambulante sira, Jestaun no Merkadu halo ona iha 28 abríl, liuhosi aproximasaun no fó sa avizu. Aleinde ne’e, horisehik nafatin fó sai avizu ba sira maibé kuandu sira la fiar mak iha 07 maiu ne’e, Jestaun no Merkadu sei foti hotu sira-nia sasán.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here