Administradór munisípiu Viqueque, Januario Soares 'Bolly'. Imajen Tatoli/Vitorino Lopes da Costa

VIQUEQUE, 05 maiu 2022 (TATOLI)-Administradór munisípiu Viqueque, Januario Soares “Bolly” husu autoridade postu Uatulari inklui populasaun kolabora ho programa governu liuhosi Eletrisidade Timor Leste, Empreza Públika (EDTL, EP)  atu monta prepagu ba uma sira.

Antes ne’e parte tékniku EDTL sira monta prepagu ba uma sira iha postu Uatulari, maibé iha autoridade no populasaun la aseita hodi instala.

“Tanba ne’e, ha’u husu administradór postu no xefe suku inklui populasaun tenki kolabora ho governu no EDTL, EP sira hodi monta prepagu ba uma sira”, Januario Soares “Bolly”, hateten ba jornalista Tatoli iha nia knaar fatin, kinta ne’e.

Autoridade munisípiu Viqueque ne’e dehan, programa EDTL, EP atu monta prepagu katak populasaun tenki selu maka uza eletrisidade no oras-ne’e daudaun komunidade barak maka uza ona prepagu. Tan  ne’e, komunidade tenki halo kolaborasaun ho parte EDTL, EP sira.

“Kazu Uatulari ne’ebé komunidade no xefe suku balun impede monta prepagu ba uma sira ne’e, antes halo ona sosializasaun. Maibé ikus mai ekipa EDTL, EP sira atu ba monta, ita-nia populasaun impede, tanba ne’e postu Uatulari seidauk monta prepagu”, nia haktuir.

Nia dehan, diretór EDTL, EP munisípiu Viqueque relata ona kazu ne’e ba Prezidente EDTL, EP no Prezidente EDTL, EP haruka ona karta bá Ministru Adiministrasaun Estatal (MAE) hodi husu apoiu atu kolabora ho autoridade sira tulun ekipa EDTL, EP implementa programa prepagu ba uma kain sira.

Tuir dadus família hosi postu adiministrativu Uatulari hamutuk 4.566, suku neen, aldeia hamutuk 63.

Jornalista       : Vitorino Lopes da Costa

Editora           : Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here