Uma Mídia Komunikasaun iha Parlamentu Nasionál. Imajen/Mídia PN.

DILI, 04 maiu 2022 (TATOLI)—Uma Komunikasaun hamutuk ho Parlamentu Nasionál no Conselho de Imprensa selebra loron mundiál liberdade imprensa dahuluk, ho espozisaun arte ida-ne’ebé organiza hosi Programa Nasaun Unida ba Dezenvolvimentu (PNUD) no apoiu hosi Uniaun Europeia (UE).

Abertura ba espozisaun arte ida-ne’ebé hatudu rezultadu sira hosi workshop ida ba jornalista sira-ne’ebé hala’o iha Conselho de Imprensa iha loron 27 abril liubá ne’e.

“Ohin, Programa Nasaun Unida ba Dezenvolvimentu, Parlamentu Nasionál no Conselho de Imprensa Timor-Leste, ho apoiu hosi Uniaun Europeia, organiza selebrasaun ida iha Uma Komunikasaun atu marka Loron Mundiál Liberdade Imprensa, halo abertura ba espozisaun arte iha fatin ne’e,” Prezidente Parlamentu Nasionál (PPN), Aniceto Longuinhos Guterres Lopes, hateten iha komunikadu imprensa ne’ebé Agência TATOLI, asesu, kuarta ne’e.

Uma Komunikasaun, ne’ebé finansia hosi Uniaun Europeia ne’ebé mak harii no ekipamentu ne’ebé atu fasilita servisu jornalista sira ho PN, nune’e atu ajuda sira hodi transmite informasaun ba iha teritóriu tomak.

“Aleinde prezensa loro-loron hosi dezeña jornalista sira, hala’o mós reuniaun sira iha Uma Komunikasaun, iha ne’ebé rádiu no Televizaun hosi Parlamentu Nasionál funsiona loro-loron no iha ne’ebé programa notísia sira mak grava hodi fahe informasaun relevante ho sidadaun sira iha kada semana,” nia hateten.

Nota hateten, ida-ne’e oportunidade atu esplora liberdade espresaun liuhosi kriasaun karta sira no ho orientasaun hosi dezainer gráfiku profisionál ida, profisionál komunikasaun soisiál sira koko prosesu kreativu atu kria kartá ida, maibé importante liu sira esplora potensiál hosi konseptualizasaun atu reforsa mensajen sira.

Ho selebrasaun dahuluk, Uma Komunikasaun, Embaixadór Uniaun Europeia, Andrew Jacobs, orgullu hodi fó apoiu ekipamentu Komunikasaun Sosiál nian,, nune’e bele kombate informasaun falsu sira.

“Uniaun Europeia orgullu fó apoiu ba dezenvolvimentu ba meiu komunikasaun sosiál iha Timor-Leste, no ho loron ne’e bele proteje no promove liberdade espresaun no kombate dezinformasaun,” nia dehan.

Komunikasaun soisiál ne’ebé forte, krítiku no nakfekit mak importante tebes ba kualkér demokrásia, tuan ka foun, no hatene katak jornalista sira iha ne’e iha Dili, uza Uma Komunikasaun iha sira-nia servsiu loron-loron atu hato’o informasaun sira-ne’ebé ho tempu naton no presiza, kona-na servisu Parlamentu nian atu kombate notísia falsu sira no dezinformasaun, imprensa ida ne’ebé saudável no livre nunka sai importante loos hanesan daudaun.

Importansia hosi kontribuisaun ida-ne’e ba Parlamentu Nasionál, primeiraves mak PN sei iha kapasidade tomak hosi komunikasaun hosi dook ba komisaun ida-idak, komisaun sira hosi PN sei bele komunika hosi dook ho munisípiu sira, sein iha nesesidade atu dezloka ba terrenu.

Ho atualizasaun ida-ne’e, laiha buat ida sei falta hodi asegura partisipasaun iha forum internasionál sira-ne’ebé Parlamentu Nasionál sei partisipa.

Reprezentante Rezidente PNUD, Tuya Al-tangerel, hateten bainhira buka uza feramenta interativa sira hodi envolve ho sidadaun sira no PN sei kumpre fila-fali ninia dever hodi asegura transparénsia kona-ba servisu no ligasaun di’ak ho sidadaun sira.

“Ami kontente tebes hodi kontinua fó apoiu ba Parlamentu Nasionál atu asegura katak informasaun sei bele asesível ba sidadaun sira hotu, iha baze lae ba diskriminasaun, liuhosi kanál sira oioin hanesan imprensa, rádiu, no meiu sira hotu ba ita-nia dispozisaun, mak hodi asegura katak informasaun parlamentár bele sai komprensível no to’o bá númeru boot sidadaun sira,” nia hateten.

Biban ne’e, entrega mós ekipamentu informátiku no audiovizuál ba Parlamentu Nasionál inkui televizaun ualu (8), komputadór sekretária nian no kámara hitu (7) no ba ninia komité oioin hodi sira bele liga di’ak liután ho munisípiu sira, iha ámbitu hosi desentralizasaun administrativa Timor-Leste nian.

Iha 03 maiu mak sai hanesan loron mundiál liberdade imprensa nian, loron ne’e marka importánsia ba jornalista sira atu iha asesu ba informasaun iha tempu naton no kualidade aas iha Timor-Leste, ida-ne’e permite relata ho presizaun servisu hosi PN ne’ebé permite eleitór sira atu akompaña servisu hosi instituisaun demokrátika ne’e no hosi membru PN nian ne’ebé reprezenta sira.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here