Pesoál saúde sira vasina hela labarik sira kontra moras Sarampu ba labarik sira, iha aldeia Maliana, suku Lahomea, postu administrativu Maliana, munisípiu Bobonaro. Imajen Tatoli/Sérgio da Cruz.

BOBONARO, 04 maiu 2022 (TATOLI) – Servisu Saúde Munisípiu Bobonaro (SSMB), kuarta ne’e fó vasina masál kontra moras Sarampu ba labarik sira  iha bairru Atupusing, aldeia Maliana, suku Lahomea, postu administrativu Maliana, munisípiu Bobonaro hodi aumenta imunidade isin hodi proteje-aan hosi moras ne’e.

Koordenadór Vijilánsia Epidemiolojia Munisípiu Bobonaro, Jerónimo de Sousa, hateten parte saúde halo imunizasaun ne’e tanba iha fulan kotuk bebé ida hosi bairru ne’e ba konsulta iha fasilidade saúde, médiku sira hasai raan halo teste iha indísiu ba moras Sarampu.

Ho nune’e parte saúde foti sampel dala-rua hosi bebé ne’e ho nia família iha ba halo teste iha Labotaróriu Nasionál (LABNAS), Dili, no rezultadu amostra deteta katak bebé ne’e konfirmadu pozitivu moras sarampu/Rubella.

Antes ne’e pesoál saúde sira husu informasaun hosi família katak suspeitu durante ne’e konsege lori  ba mai Atambua, Indonézia, maibé familia katak bebé iha uma de’it,entaun signifika katak virus ne’e halo de’it movimentu iha bairu ne’e.

Tanba ne’e parte servisu saúde munisipál servisu ho Organizasaun Mundiál Saúde (OMS) halo kedas intervensaun urjénsia tanba moras Sarampu/Rubella daudaun ne’e Timor-Leste tama ona faze post eliminasaun.

Pesoál saúde sira vasina hela labarik sira kontra moras Sarampu ba labarik sira, iha aldeia Maliana, suku Lahomea, postu administrativu Maliana, munisípiu Bobonaro. Imajen Tatoli/Sérgio da Cruz.

“Entaun kazu ida mosu tán ita konsidera hanesan surtu, tanba ne’e ohin ami mai halo vasina ne’e ba bebé ne’e nia família no labarik sira-ne’ebé nia radius ne’e metro 100 hosi suspeitu ne’e ho nia objetivu atu hamate kedas prezensa Sarampu ninia infesaun nune’e labele da’et ba komunidade sira seluk,” Koordenadór Vijilánsia Epidemiolojia Munisípiu Bobonaro, Jerónimo de Sousa informa ba jornalista sira, hafoin vasina ba labarik sira.

Administradór postu administrativu Maliana, Tomás Lacu-Loe, agradese ba servisu saúde munisípiu Bobonaro tanba halo kedas intervensaun sériu hodi hamate transmisaun surtu ne’e ba kumunidade, liuliu labarik sira.

“Ha’u husu saúde atu servisu maka’as liután atu moras ne’e labele kona fali komunidade sira seluk, maibé importante liu mak inan-aman sira kuidadu oan sira, kuandu moras karik tenke hakbesik-aan lalais ba sentru saúde atubele hetan vasinasaun,” nia fó hanoin.

Entretantu atividade imunizasaun ne’e partisipa másimu hosi komunidade sira no akompana direita hosi lideransa komunitária hanesan, xefe aldeia no xefe suku, no hetan seguransa másimu hosi Komandu Polísia Nasionál Timor-Leste (PNTL) munisípiu Bobonaro hosi eskuadra Maliana.

Jornalista: Sérgio da Cruz

Editór: Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here