Membru F-FDTL foun sira halo atrasaun haksuit, Iha Sentru Formasaun Treinu Metinaru, segunda (31/01). Imajen Tatoli/Francisco Sony

DILI, 04 maiu 2022 (TATOLI)-Governu liuhosi reuniaun Konsellu-Ministru, kuarta ne’e, aprova ona proposta rekrutamentu ba membru FALINTIL-Forsa Defeza Timor Leste (F-FDTL) foun hamutuk na’in 600.

Ministru Prezidénsia Konsellu Ministru, Fidelis Manuel Leite Magalhães, informa, proposta rekrutamentu ba membru F-FDTL foun na’in 600 ne’e, ohin aprezenta husi Ministru Defeza (MD), Filomeno da Paixão de Jesus.

Notísia relevante :OJE 2022: MD sei rekruta membru F-FDTL 600

“Konsellu Ministru delibera atu aprova efetivu anuál atu inkorpora iha FALINTIL–Forsa Defeza Timor-Leste iha tinan 2022, tuir projetu ne’ebé aprezenta husi Ministru Defeza, Filomeno da Paixão de Jesus,” Fidelis Manuel Leite Magalhães, relata hafoin reuniaun ezekutivu iha Palásiu Governu.

Rekrutamentu militár inkorporasaun ema na’in 600 ne’e, sei koloka na’in 240 ba komponente Forsa Navál,  240 ba komponente Forsa Terrestre no na’in 120 ba unidade sira seluk.

Entretantu, antes ne’e, iha loron 27 setembru 2021, membru foun F-FDTL na’in-600 inkorpora ona ba Komponente Formasaun no Treinu Metinaro, hodi submete ba formasaun militár durante fulan-neen atu bele hala’o knaar iha instituisaun defeza ne’e.

Tuir dokumentu livru 2 planu asaun anuál OJE 2022, Ministériu Defeza prioritiza programa ho kódiku 388 kona-ba Defeza Nasionál ho nia sub-programa formasaun no dezenvolvimentu rekursu umanu iha área defeza no seguransa ho nia atividade mak halo rekrutamentu militár no funsionáriu Ministéiru Defeza, ne’ebé ho alokasaun orsamentu iha verba saláriu vensimentu no bens servisu ho totál $650,127.

Notísia relevante :MD sei rekruta membru F-FDTL foun na’in-600 iha abríl 2022

Jornalista : Antónia Gusmão.

Editór    : Agapito dos Santos

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here