Prezidente Republika eleitu Jose Ramos Horta no Núnsiu Apostóliku, Monseñor Marco Sprizzi. iha edifisiu Ramos Horta Farol, kuarta (04/05). Imajen Tatoli /Egas Cristóvão

DILI, 04 maiu 2022 (TATOLI)— Prezidente Repúblika eleitu períodu 2022 too 2027, José Ramos Horta, kuarta ne’e, halo audénsia ho Reprezentante Vatikanu Iha Timor-Leste, Núnsiu Apostóliku Monseñor Sprizzi hodi ko’alia situasaun polítiku rai-laran no papél igreja iha área edukasaun.

“Ohin, Ha’u relata evolusaun situasaun Polítika iha rai-laran ba Reprezentante Santa Sé iha Timor- Núnsiu Apostólikú Monseñór Marco Sprizzi no ko’alia mós papél igreja nia iha rai-laran kona-bá edukasaun. Tanba igreja iha papél importante iha área direitu umanu, unidade nasionál, rekonsiliasaun no dame,” PR eleitu ne’e hateten hafoin audénsia ho reprezentante Vatikanu ne’e iha gabinete Nobél da Paz, faról, kuarta ne’e.

Tanba, Horta dehan setór edukasaun ne’e, la’ós Governu nia responsablidade  de’it, maibé  ema  hotu nia responsablidade liuliu parte Igreja atu hametin kualidade edukasaun iha Timor-Leste.

“Ita hakarak povu ne’e 100% edukadu, iha valór umanu, valór relijoza no tenke iha tékniku profisionál atubele kompete iha rejiaun no mundu,” Horta afirma.

CONECTIL prefere kualidade edukasaun

Entretantu, Komisaun Nasionál Edukasaun Katólika Timor-Leste (CONECTIL), hasoru malu ho Prezidente Repúblika eleitu José Ramos Horta, hodi husu durante mandatu bele kria gabinete própriu atubele promove setór edukasaun ho kualidade iha Timor-Leste.

“Ami husu se bele nia (José Ramos Horta) nia-mandatu tinan lima mai ne’e, kria gabinete ida bele fó atensaun ba setór edukasaun iha Timor-Leste hodi garante kualidade,” Prezidente CONECTIL, Padre Mateus Afonso rekomenda.

CONECTIL mós husu ba PR Eleitu atubele fó motivasaun ba Ministru Edukasaun no Uma-Kreda hanesan parseria iha aréa edukasaun atu labele tau matan de’it ba eskola katólika, maibé tau matan ba eskola públiku.

Jornalista: Natalino Costa

Editór      : Florencio Miranda Ximenes     

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here