Sekretáriu Estadu Juventude no Desportu, Abrão Saldanha. Imajen TATOLI/Francisco Sony

DILI, 04 maiu 2022 (TATOLI) – VIII governu konstitusionál liu husi Sekretáriu Estadu Juventude no Desportu (SEJD) prevee iha orsamentu retifikativu millaun $2,6 atu harii sede ba Grupu Arte Marsiál (GAM) iha territóriu nasionál.

Proposta program atu harii sede ba Grupu Arte Marsiál ho orsamentu millaun $2,6 iha orsamentu retifikativu, ne’e la aseita husi bankada opozisaun CNRT, wainhira iha diskusaun laran ne’ebe halao iha komisaun C Parlamentu Nasionál, kuarta ne’e.

Bankada opozisaun CNRT la konkorda hodi  husu ba Sekretáriu Estadu Juventude no Desportu (SEJD) atu identifika didi’ak  programa prioridade sira molok deside harii sede ba GAM sira.

Deputada Carmelita Moniz husi bankada opozisaun CNRT nomos nudar Deputada Komisaun C Parlamentu Nasional dehan, bainhira atu fó legalizasaun ka loke rejistu ba Grupu Arte Marsiál ida tenke iha estatutu klaru. Tenke iha fatin treinamentu, iha formadór, no tenke iha estrutura inklui misaun no vizaun tenke klaru. Kuandu kompleta ona maka foin halo rejistu hodi hetan legalidade hosi Komisaun Reguladora Arte Marsiál Timor-Leste (KRAM).

“Ha’u atu husu de’it ba ita boot (SEJD), sé estadu ka governu maka harii fali sede ba arte marsiál ne’e entaun ezije GAM tenke  kompleta rekizitu sira ne’e. Tanba, GAM ne’e hanesan asosiasaun privada,” Tenik nia.

Nu’udar deputada iha Komisaun C hakarak hatene de’it prioridade importante saida mak SEJD atu aselera tuir programa VIII governu nian ne’ebé aprova iha PN ne’e. Harii sentru multi funsaun ba juventude iha Munisípiu hotu hodi haree ba formasaun multi lingua teknolojia, arte múzika no desportu no edukasaun sívika ne’e maka importante liu ka harii sede espesiál ba GAM maka importante.

“Ita boot (SEJD) ninia konsentrasaun iha programa VIII governu ne’e mós atu harii multi funsionál depois halo mós kompetisaun desportivu, kompetisaun Pasífiku no kompetisaun pasivu ba GAM sira. Ida ne’e ita boot halo too iha ne’ebé,” husu deputada Carmelita ba SEJD.

Hatan ba preokupasaun deputada nian ne’e, Sekretáriu  SEJD, Abrão Nokosiku Saldanha dehan besik tinan sanolu (10) ona Grupu Arte Marsiál sira ne’e nunka hetan benefísiu hosi investimentu públiku sira maske kada tinan SEJD sempre investe millaun $2-resin. Tan ne’e, tempu to’o ona tenke halo ona investimentu ba sira. Tanba númeru ne’ebé pratika Arte Marsiál kuaze joven rihun 200-resin iha Timor-Leste.

“Ita iha dadus hosi KRAM hatudu katak kada tinan kuaze joven rihun haat ate rihun lima mak sai ba Atambua no Kupan, Indonézia hodi hala’o sira nia graduasaun. Despeza ne’ebé sira gasta iha nasaun viziñu ne’e ema ida ki’ik liu maka $500 dolar amerikanu. Osan sira ne’e sira uza hodi sosa manu no atributu graduasaun nian,” dehan SEJD Abrão bainhira hala’o soromutu ho Komisaun C Parlamentu Nasionál.

Tamba ne’e, nia hatutan kuandu VIII governu deside re-ativa fila fali atividade GAM iha Timor-Leste, maka SEJD kumprimentu hodi legaliza graduasaun GAM nian iha Timor-Leste. Ida atu osan ba graduasaun membru GAM sira nian ne’ebé uluk investe ba rai li’ur bele jere de’it ona iha rai laran hodi  fo benefisia fali ba agrikultór sira liu hosi manu ne’ebé sira hakiak bele iha fali rendimentu. Inklui mós atu harii sede ba GAM sira.

Membru governu ne’e esplika katak iha razaun sosiál balun hosi impaktu ekonómiku bainhira re-ativa fila fali grupu arte marsiál sira. Ezemplu maka grupu arte marsiál Persaudaraan Setia Hati Terate (PSHT). Dezde governu taka atividade organizasaun sira ne’e iha Timor-Leste maibé sira kontinua hala’o atividade ilegál liu hosi dalan kruza fronteira hodi ba hala’o graduasaun. Maibé kuandu tinan ida ne’e maka graduasaun ba GAM sira konsege realiza iha TL bele fo benefisiu  ekonomiku ba agrikultór sira.

Jornalista : Tomé Amado

Editóra    : Armandina Moniz

 

 

    

 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here