Xefi Suku Maubisse Vila, Munisípio Ainaro, Wilson Nivio Maria Pereira Mendonça. Foto Tatoli/Mirandolina Barros Soares

DILI, 03 maiu 2022 (TATOLI)—Xefe Suku Maubisse Vila, Munisípiu Ainaro, Wilson Nivio Maria Pereira Mendonça, husu Eletrisidade Timor-Leste, Empreza Públika (EDTL, E.P), instala loja faan pulsa eletrisidade iha Maubisse Vila, nune’e komunidade sira bele asesu.

“Ami husu ba parte Governu ni’an atu instala uluk sistema faan pulsa, molok instala prepagu, atu nune’e komunidade sira bele hola pulsa,” Wilson Nivio Maria Pereira Mendonça hateten ba Agência Tatoli, via telefónika, tersa ne’e.

Maubisse Vila daudaun ne’e ahi mate no lakan maibé EDTL sira mai monta ona prepagu, kuaze maiória sira instala ona prepagu ba komunidade sira maibé problema ida-ne’ebé komunidade sira hasoru mak EDTL sira seidauk instala fatin ba faan pulsa eletrisidade, maibé sira liga ona prepagu ba komunidade sira.

“Dadaun ne’e, ita-nia komunidade kuaze barak mak ahi mate, liu-liu iha área rurál, sira ne’e labele asesu ba iha pulsa. Tanba, foin daudauk ita-nia empreza kiik-oan ida mak faan pulsa, maibé agora daudauk nia taka tiha. Tanba, nia sente katak pursentu ne’ebé nia hetan ne’e kiik liu ho gastu ba internet boot liu, tanba ne’e nia taka,” nia dehan.

Ho empreza kiik taka loja faan pulsa eletrisidade ne’e, komunidade sira hahú hasoru difikuldade no dala barak liu sira hola liuhosi Mosan, maibé Mosan nia resposta dala ruma bele han to’o loron rua, tolu kuandu iha loron feriadu.

“Nune’e, ita haree ho tan instalasaun prepagu ne’e fó tan ameasa boot ba ita-nia komunidade iha momentu ida-ne’ebé eletrisidade la mate, maibé eletrisidade sira-nia uma mate bainhira la asesu ba pulsa,” nia dehan.

Entretantu, tuir dadus hosi Xefe Suku Maubisse Vila, Munisípiu Ainaro, Wilson Nivio Maria Pereira Mendonça, katak populasaun iha Maubisse Vila hamutuk 7.316.

Preokupa ho eletrisidade mate-lakan

Entretantu, autoridade lokál ne’e preokupa ho eletrisidade iha Maubisse Vila, tanba eletrisidade iha Maubisse Vila ne’e mate lakan kuaze tinan ida ona.

“Kondisaun ida-ne’ebé ita-nia komunidade iha suku Maubisse enfrenta mak eletrisidade mate-lakan la ne’ebé konsege estraga ita-nia komunidade sira-nia sasán elettrónika barak hanesan Televizaun, Kuluna, Jeleira, no sasan eletrisidade kiik sira seluk mak sai keima hotu,” Wilson Nivio Maria Pereira Mendonça hateten.

Nune’e, komunidade sente triste tebes tanba sira lakon sira-nia sasán eletróniku sira-ne’e katak sira lakon sira-nia osan.

Komunidade nia preokupasaun ne’e, nia parte informa ona ba EDTL maibé resposta ne’ebé mai hateten katak tanba impaktu hosi rai halai halo besi-riin iha dalan ninin sira monu, entaun ida ne’e fó impaktu hotu ba suku Maubisse.

Alende ne’e, hosi parte seluk eletrisidade hosi Maubisse fahe fali mai to’o Turiskai, entaun failansu ne’ebé enfrenta iha Turiskai nian afeta mós ba to’o iha suku Maubisse.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here