Inspetór Jerál AIFAESA, Ernesto Monteiro, konfirma presu sasán nesesidade bazika ba traballadór iha Loja Creative Furak, kuarta (19/01). Imajen TATOLI/Francisco Sony

DILI, 03 maiu 2022 (TATOLI)-Primeiru-Ministru, Taur Matan Ruak, tersa ne’e, konvoka reuniaun ida ho Ministru Turizmu Komérsiu no Indústria, José Lucas do Carmo da Silva, Vise-Ministru Agrikultura no Peska , Abílio Xavier de Araújo, no mós Sekretáriu Estadu Peska, Elídio de Araújo hodi ko’alia kona-ba polítika Governu hodi halo intervensaun ba folin sasán iha merkadu.

Ministru Turizmu Komérsiu no Indústria (MAP), José Lucas do Carmo da Silva, hateten atu normaliza presu sasán nesesidade báziku iha rai-laran maka persiza aumenta produsaun iha rai-laran liuhosi  ezisténsia setór produtivu sira hodi prodúz barak liután.

Notísia Relevante :PR Lú Olo preokupa ho folin sasán sa’e iha rai-laran

Aleinde ne’e, Governu planea sei fó mós  kreditu ba empreza distributor sira ne’ebé maka durate ne’e halo distribuisaun ba sasán nesesidade bazíka nune’e bele faan sasán ho presu normal ba konsumidór sira iha Timor-Leste.

Nia hateten primeiru-ministru konsidera Ministériu Agrikultura no Peska  maka responsabiliza ba kestaun hasa’e produsaun iha rai-laran no MTCI maka Ministériu ida ne’ebé haforsa produtór sira hodi hasa’e produsaun depois organiza hodi lori bá faan iha merkadu.

“Ami hamutuk ho primeiru-ministru diskute kona-ba ba kadeia valór katak oinsá haforsa setór produtivu sira liuhosi kooperasaun liña ministeriál,” nia dehan ba jornalista sira iha Rezidénsia PM Faról, tersa ne’e.

Atu legaliza polítika ne’e, Governante ne’e esplika sei aprezenta asuntu ne’e ba membru governu seluk iha reuniaun Konsellu-Ministru hodi halo revizaun ba dekretu-lei balun no mós kria rezolusaun atu konkretiza liña koordenasaun nune’e bele responde ba situasaun ne’ebé daudaun ne’e akontese.

“Asuntu presu nesesidade ne’ebé dadaun sa’e maka’as, ida ne’e maka asuntu pertinente primeiru-ministru haree katak presiza servisu hamutuk atu halo balansu ka intervensaun ba presu ne’e rasik. Tanba ne’e maka MTCI haree oinsá haforsa liután empreza ki’ik sira liuhosi kréditu ne’ebé durante ne’e iha ona hanesan kréditu Soabe,”nia haktuir.

Programa Cexta Bázika hanesan mós meius ida atu halo intervensaun ba presu sasán iha merkadu, tanba ne’e, nia hateten Governu sei halo distribuisaun Cesta Bázika ba populasaun iha Timor-Leste, iha tempu besik.

“Substánsia ida ami mai ko’alia ho primeiru-ministru ne’e, mekanizmu ida ne’ebé ami tenta atu halo balansu ba presu, tanba ne’e ami la-imediata ba komunidade maibé servisu ho empreza ki’ik no boot sira, hodi fasilita sira ho kréditu no sei fasilita tebes sira tanba sira mak autór ekonomia ativu tebes iha setór produtivu, hein katak ho maneira sira ne’e sei hasa’e produsaun nune’e balansu ba iha presu,” nia dehan.

Notísia Relevante :AIFAESA identifika folin nesesidade bázika sa’e oituan tanba transportasaun sasán

Jornalista : Antónia Gusmão.

Editór      :Agapito dos Santos

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here