Komunidade Muslmanu selebra loron Idul Fitri iha Meskita An-Nur Kampug Alor Dili, segunda (02/05). Imajen Tatoli/Francisco Sony

DILI, 02 maiu 2022 (TATOLI) – Prezidente Repúblika (PR), Francisco Guterres Lú Olo, saúda ba kompatriota musulmanu sira hotu, iha Timor-Leste (TL) no iha rai-liur, ne’ebé ohin, selebra Idul Fitri hamutuk, hafoin tuir faze Ramadhan ho rituál jejun durante fulan ida.

“Ha’u aproveita loron espesiál atu husu dala ida tan ba sidadaun ida-idak, atu fó liman ba malu, nu’udar timoroan, no tane hamutuk prinsípiu no valór sira ne’ebé hametin ita nu’udar povu ida de’it, moris iha uma lisan boot ida de’it Timor-Leste”, Francisco Guterres Lú Olo, hateten liuhosi nota komunikadu ne’ebé Agência Tatoli asesu, segunda ne’e.

Prezidente Lú Olo husu ba komunidade musulmana iha Timor-Leste no mós iha Indonézia no rai sira seluk, ne’ebé ohin selebra loron Idul Fitri ho laran moos, perdua malu ona, halo ona rekonsiliasaun nu’udar família no nu’udar komunidade.

“Ho selebrasaun ida ne’e, família uma laran haklean nafatin sira nia domin no respeitu ba malu, tanba ne’e, importante tebes ba Timor-Leste valoriza loron Idul Fitri”, katak.

Tuir nia, iha loron 19 maiu tuir mai, nia sei ramata nia mandatu nu’udar Prezidente Repúblika maibé sei la hakotu nia misaun nu’udar servidór Nasaun no Povu Timor-Leste.

“Hamutuk nafatin ho kompatriota ida-idak, tuir kbiit no matenek ida-idak nian, ita hotu sei fó liman ba malu hodi hametin ita-nia Estadu Direitu Demokrátiku, kuda pás no estabilidade, dezenvove ita-nia rai doben no hasa’e moris-di’ak ba povu tomak”, konklui.

Jornalista : Arminda Fonseca

Editór : Zezito Silva

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here