Traballadór sira hala'o marsa la'o-ain hosi edifísiu KSTL mai Palasiu Governu hodi komemora loron mundiál traballadór iha loron 1 Maiu, domingu (01/05). Imajen Tatoli/Francisco Sony.

DILI, 01 maiu 2022 (TATOLI) – Prezidente Konfederasaun Sindikatu Timor-Leste (KSTL), Almeiro Vila Nova, husu Governu hasa’e saláriu traballadór mínimu $115 ba $200.

Prezidente Almeiro Vila Nova, hateten loron 1 maiu nu’udar loron mundiál ba traballadór sira hotu iha mundu, inklui Timor-leste, tanba ne’e KSTL organiza asaun la’o-ain hosi Bemori mai to’o Pálasiu Governu atubele refleta nafatin ba espíritu luta traballadór sira iha tempu pasadu ne’ebé sakrifika sira-nia aan, hodi luta ba redúz oras servisu, hosi 18 oras mai oras ualu (8).

“Iha Timor-Leste, ita halo ida-ne’e atu fó hanoin ba Governu kona-ba preokupasaun traballadór sira hotu ne’ebé enfrenta saláriu mínimu to’o ohin loron nunka sa’e. Alende ne’e, preukupasaun kona-bá empregu ba juventude no ba ema hotu, preukupasaun kona-ba kondisaun traballu sira iha serbisu ne’ebé to’o ohin loron la’o seida’uk di’ak,” Almeiro Vila Nova, hateten ba jornalista sira, hafoin marsa la’o-ain ho traballadór sira hosi Bemori mai to’o Pálasiu Governu, Díli, domingu ne’e.

Hosi asaun ne’e, KSTL hamutuk ho traballadór sira komemora, depois sei submete petisaun nu’udar ezisénsia ba iha Parlamentu Nasionál, Governu no Institusaun relevante atubele konsidera ba preokupasaun sira-ne’ebé duranta ne’e traballadór sira enfrenta.

“Ita triste tebes, tanba saláriu mínimu iha tinan 10 nia laran la iha mudansa, tanba iha nasaun hotu-hotu saláriu mínimu ne’e bele halo revizaun kada tinan ida dala ida ka tinan rua dala-ida, maibé iha Timor-Leste ida-ne’e la akontese, nune’e iha loron tolu liubá ami rona informasaun katak Governu sei halo revizaun ba saláriu mínimu iha tinan oin, tanba ne’e ami hakarak aproveita ho tempu ne’e atu ezize nafatin ba Governu, atu realiza saláriu mínimu iha tinan ne’e la’ós iha 2023,” nia akresenta.

Ho asaun marsa la’o ain ne’e mak Governu la realiza hodi hasa’e saláriu ba trabalaadór sira, nune’e ba oin KSTL sei mobiliza traballadór hotu atu kontinua ejize Governu bele kosidera saláriu mínimu ne’e.

Traballadór Bengkel One Love, Jelina da Costa Noronha, husu Governu hasa’e saláriu mínimu traballadór $115 ba $200.

“Tuir ha’u-nia hakarak sebele ami-nia saláriu mínimu $115 bele hasa’e, tanba ho $115 ami hola hahan atu han iha fulan ida ne’e nia laran la to’o, tuir ha’u-nia hakarak Governu hato’o ba ami-nia patraun atu hasa’e ami-nia saláriu hosi $115 ba $150 ka $200 atu nune’e ami bele sustenta ba ami-nia moris,” nia husu.

Jornalista : Nelia Fernandes
Editór       : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here