Jogadór selesaun nasionál TL no ofisiál sira hasai foto hamutuk ho Embaixadora TL ba Malázia. Imajen espesiál

MALAZIA, 01 maiu 2022 (TATOLI) – Embaxadora Timor-Leste iha Malazia, Joana Veneranda Amaral, hamutuk ho nia ekipa agradese no orgullu ba luta selesaun nasionál U-23 ne’ebé manán ekipa selesaun U-23 Malazia nian ho rezultadu 2-1.

“Hanesan timoroan no reprezenta Governu Timor-Leste iha ne’e, apresia no kontente los ba imi nia susesu ne’e, maske jogu amigável de’it maibé foin dahuluk iha istória futeból ita manán sira, ami kontente los”, dehan embaxadora ne’e ba Agência TATOLI iha nia rezidénsia Malazia, sabadu ne’e.

Amaral lori mós povu no Governu Timor-Leste nia naran agradese ba treinadór Brazileiru, Fabio Maciel da Silva, ne’ebé konsege halo mudansa ba futeból Timor-Leste.

“Ami agardese tebes ba Sr. Fabio, ita boot nia esforsu too ikus muda duni futeból Timor-Leste nian, hahú iha kopa AFF to´o mai jogu sira hanesan ne’e ita hare kapas los, mantein no tau matan didiak nafatin ba ami nia jogadór sira”, refere.

Ho nuune’e, nia fiar iha jogu Sea Games sei hatudu rezultadu di’ak ho dignidade hanesan timoroan.

Iha sorin seluk treinadór Fabio lori jogadór no ekipa hotu hato´o agradese ba embaxadora ho nia ekipa ne’ebé apoiu másimu tebes ekipa selesaun U-23.

“Ha’u lori ekipa hotu nia naran agaredese mós ba embaxadóra ho ekipa ne’ebé prepara ona hahan mai ami hodi ita han hamutuk no suporta tomak”, revela.

Kapitaun ekipa, Filomeno Junior da Costa, agradese ba embaxada ho ekipa ne’ebé bele prepara ai-han ba jogadór sira bele han hamutuk.

“Hanesan kapitaun ekipa ami agradese ba embaxadora ne’ebé prepara ona ai-han mai ami hodi han hamutuk hodi selebra vitória simples ne’e”, konklui.

Jornalista: Hortencio Sanchez

Editór : Zezito Silva

 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here