VIQUEQUE, 01 Maiu 2022 (TATOLI) – Aldeia rua iha suku Bibileo, postu administrativu Viqueque, munisípiu Viqueque, seidauk asesu ba bee-moos no eletrisidade.
Xefe suku Bibileo, Maria Odete dos Anjos Amaral, informa, aldeia rua iha suku Bibileo ne’e mak hanesan Lakuai no Hari-Oan seidauk asesu ba liña eletrisidade no bee-moos.
“Iha ha’u-nia suku ne’e aldeia rua maka seidauk asesu ba liña eletrisidade no bee-moos tanba populasaun sira, iha liu liu área rurál liu tanba ne’e sira seidauk asesu”, Maria Odete dos Anjos Amaral, informa ba Agência Tatoli, iha postu administrativu Viqueque Vila, domingu ne’e.
Maria hatutan, autoridade konsulta ho ministériu relevante hodi tau matan ba populasaun sira- ne’ebé maka seidauk asesu eletrisidade no bee-moos tanba hahú hosi Timor-Leste independénsia populasaun hosi aldeia rua ne’e seidauk asesu ba eletridade no bee-moos.
“Ita halo ona koordenasaun ho ministériu relevante sira ho haree asuntu sira-ne’e tanba Timor Leste hetan independénsia to’o agora ita-nia populasaun sira-ne’e seidauk asesu ba,” nia hato’o.
Tuir dadus populasaun hosi suku Bibileo aldeia rua ne’ebé maka seidauk asesu ba eletrisidade no bee-moos uma ka’in hamutuk 100-resin.
Iha fatin seluk, Adiministradór munisípiu Viqueque, Januário Soares “Bolly”, haktuir, papulasaun sira ne’ebé maka seidauk asesu ba elettrisidade Eletrisidade Timor-Leste, Empreza Públiku (EDTL,E.P) maka sei tau matan hodi dada eletrisidade ba sira.
“Ita-nia populasaun sira-ne’ebé maka seidauk asesu ba eletrisidade ne’e EDTL,EP maka sei haree agora daudaun suku balun ne’ebé seidauk asesu ba eletrisidade kompañia sira hahú dada liña eletrisidade ba,” tenik nia.
Jornalista : Vitorino Lopes da Costa
Editór : Evaristo Soares Martins
