Peskadór hadi’a hela bero hodi prepara ba kail ikan, iha Dili (09/12/2020) Imajen Tatoli/António Gonçalves

DILI, 29 abril 2022 (TATOLI)—Ministériu Agrikultura no Peska (MAP) liuhosi Diresaun Nasionál Peska, identifika no prepara ona lista benefisiáriu hamutuk 685 atu hetan subsídiu kombustível hosi Governu.

“Dadus ne’ebé ita-nia ekipa téknika prepara atu hetan subsídiu kombustível hosi parte MAP, ba atividade peska iha benefisiáriu hamutuk 315 no agríkola hamutuk 370, ne’ebé kobre ona iha territóriu nasionál,” Koordenadór Jerál ba programa subisídiu kombustível no atuál Diretór Nasionál Peska, Acácio Guterres, informa ba Agência Tatoli, via telefónika, sesta ne’e.

Notísia relevante: Governu koordena mekanizmu implementasaun subsídiu kombustível ho entidade envolvidu

Kestaun ne’e relasiona ho dekretu-lei númeru 18/2022 kona-ba atribuisaun subsídiu kombustível ba operadór transporte rodoviáriu públiku, transporte aéreu no marrítima nasionál, inklui adkirente kombustível destinadu ba atividade agríkola no piskatória, ne’ebé tempu badak Governu sei implementa.

Antes ne’e, ekipa téknika hosi MAP tuun diretamente foti dadus, ne’ebé durante ne’e rejistu iha ministériu, nune’e evita atu hamosu manipulasaun dadus.

Nune’e, Ministériu Petróleu no Minerál (MPM) ne’ebé prodús voucher sei haruka ba MAP hodi distribui ba munisípiu sira, no ikus liu distribui ba benefisiáriu sira.

“Bainhira operadór sira tama lista benefisiáriu no hetan ona voucher, kritéria ba sira hetan subsídiu kombustível, bainhira ba estasaun kombustível tenke lori voucher inklui kartaun eleitorál, tanba naran rejista ona. Hanesan ba operadór agríkola ida, sé mak xefe grupu sei tau sira-nia naran no eleitorál, nune’e atu enxe mina iha estasaun kombutível bele lori hodi hatudu. Mekanizmu hanesan hotu ba benefisiáriu atividade agríkola no peska,” nia esplika.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here