Prezidente Repúblika eleitu ba períodu 2022-2027, José Ramos Horta, hasoru malu ho Koordenadór Plataforma VIII Governu Konstituisional no Atuál Sekretáriu Jerál Partidu Fretilin, Mari Alkatiri. Imajen/Facebook: José Ramos Horta.

DILI, 29 abríl 2022 (TATOLI)–Prezidente Repúblika eleitu, José Ramos Horta, hateten nia parte hasoru malu ho Koordenadór Plataforma VIII Governu Konstitusional no Atuál Sekretáriu Jerál Partidu Fretilin, Mari Alkatiri, iha kinta (28/04), ko’alia kona-ba Koordenasaun ho Governu haree ba situasaun ekonomia nasaun nian.

Laureadu Prémiu Nobel da Paz ne’e hateten, atu haree ba situasaun ekonomia nasaun nian ne’e oinsá mak Prezidente Repúblika bele servisu ho Governu no órgaun soberanu sira seluk atu mobiliza rekursu nasionál hodi trava ekonomia Timor-Leste ne’ebé monu hodi salva povu kiik sira-nia moris.

“Hau ko’alia ho Koordenador Plataforma, Mari Alkatiri kona-ba prosesu tranzisaun hand over no ko’alia situasaun ekonomika, sosiál iha Timor-Leste, no Timor-Leste labele kontrola tanba funu boot iha Ukránia no Rúsia, COVID-19 iha Xina ataka sidade Sanghai. Maibé ita iha responsavilidade haree agora ba oin eleisaun liu ona, oinsá Prezidente Repúblika bele servisu ho Governu no Parlamentu Nasionál hodi mobiliza rekursu nasionál hodi trava ita-nia ekonomia monu liu-tan atu bele tane ekonomia no povu ki’ik sira-nia moris,” Prezidente Repúblika Eleitu, José Ramos Horta, hateten hodi responde Agéncia Tatoli hafoin partisipa misa agradesimentu ba vitória eleisaun prezidensiál iha kapela Bairru Pite, Perumnas, sesta ne’e.

Durante sorumutu iha reasaun di’ak hosi Mari Alkatiri tanba hatudu sentidu Estadu prontu halo diálogu, nune’e líder nasionál ne’ebé esperiénsia bele kontinua kolabora ho Prezidente repúblika foun.

“Mari Alkatiri hatudu sentidu Estadu ne’ebé di’ak. Antes ne’e, Prezidente Lú Olo mós ha’u ko’alia, agora bainhira Lú Olo ramata nia funsaun iha 19 maiu kalan maibé nia lidér nasionál esperiénsia bele kontinua mós kolabora ho Prezidente foun, Parlamentu, Governu, nune’e nasaun ne’e labele sai vítima boot ba krize mundiál,” nia dehan.

Enkuantu, rezultadu provizóriu eleisaun prezidensiál segunda volta kandidau PR, José Ramos hetan hetan votu 398.028 (62,1%) no kandidatu, Francisco Guterres ‘Lú Olo’ hetan votu 242.939 (37,9%).

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here