Ministra Saúde, Odete Maria Freitas Belo, akompaña hosi reprezentante Administradór Francisco de Jesus ho Diretòr Óspital Refensia Covalima, José Ferreira, asina palaka. Imajen Tatoli/Celestina Teles.

COVALIMA, 28 abríl 2022 (TATOLI)–Ministra Saúde, Odete Maria Freitas Belo, apela ba kargu xefia ho nia ekipa sira iha munisípiu Covalima atu uza fasilidade saúde ho kuidadu liu-liu finaliza konstrusaun izolamentu, ICU no laboratóriu foun ne’ebé inaugura ona.

“Konstrusaun izolamentu, ICU no laboratoriu foun ne’ebé mak iha, ha’u entrega ba ita-boot sira, diretór ezekutivu óspital referénsia no diretora servisu saude Covalima ho nia ekipa tomak, atu kuidadu fasilidade no halo manutensaun buat ki’ik sira-ne’ebé mak ha’u la presiza atu ko’alia,”  Odete Maria Freitas Belo hateten liuhosi nia diskursu, bainhira inaugura konstrusaun izolamentu, ICU no Laboratóriu iha óspital Referénsia Covalima, kinta ne’e.

Fasilidade saúde ne’ebé inaugura ona espera labele uza ba moras COVID-19, uza ba moras-sira kontazioja no la’ós kontazioja maibé imunizasaun vasina la atinje 85%, konstrusaun ne’e sei uza nafatin ba pasiente COVID-19.

“Bainhira ita-nia imunizasaun vasina la atinje 85%, konstrusaun ne’e ita uza nafatin ba pasiente COVID-19. Ha’u sente, ita hakarak konstrusaun ne’ebé mak iha, ita uza ba moras sira seluk,” nia hateten.

Governante ne’e apela ba populasaun sira atu simu vasina, pelumenus doze dahuluk ne’e bele atinje 85%, nune’e ema hotu bele iha kondisaun ne’ebé di’ak, entaun konstrusaun sira-ne’e bele uza ba atividade rutina no servisu ezensiál sira.

Reprezentante Administradór Covalima, Francisco de Jesus Alves, agardese ba VIII Govenru Konstituisionál ne’ebé lidera hosi Pirmeiru-Ministru, Taur Matan Ruak, ne’ebé liuhosi Ministériu Saúde konstrui izolamentu, ICU no Laboratóriu iha ospitál referénsia Covalima

“Ha’u agradese ba Governu no husu ba ekipa tékniku hala’o sira-nia knar tenke kuidadu, hodi uza fasilidade ne’ebé mak iha, atu halo atendimentu di’akliu ba ita-nia povu,” nia dehan.

Maske iha ona fasilidade saúde iha postu sira, maibé presiza apoiu tan tékniku pesoál saúde sira koloka ba sentru no postu saúde sira hodi bele atende inan-aman sira iha área rurál.

Projetu konstrui ICU hahú iha 01 semebru 2020 ne’ebé finaliza iha 17 agastu 2021 ho totál orsamentu $189,959.69.

Projetu konstrui laboratóriu hahú iha 15 janeiru 2021 ne’ebé finaliza iha 26 dezembru 2021 ho totál orsamentu $70,747.68 ne’ebé foin inaugura iha loron 28 fula- abril 2022.

Serimonia inuguarasaun izolamentu, ICU no Laboratóriu ne’e partisipa hosi Ministra Saúde ho nia ekipa, diretór munisipal sira, Komandante PNTL, administradór postu administrativu sira no pesoál saúde sira

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here