Osan Dolar Amérika. Imajen/Espesiál

DILI, 27 abríl 2022 (TATOLI)-Governu ne’ebé reprezenta husi Ministru Finansa, Rui Gomes ho Ministru Asuntu Parlamentár no Komunikasaun Sosiál (MAPKOMS) Francisco Jerónimo, kuarta ne’e, submete ona proposta orsamentu retifikativu (OR) 2022 nian ba Parlamentu Nasionál ho montante billaun $ 1.129.

Prezidente Parlamentu Nasionál, Aniceto Longuinhos Guterres Lopes, maka simu diretamente proposta OR 2022 ne’e husi Ministru Finansa, Rui Gomes, iha Parlamentu Nasionál.

Rui Gomes hateten governu aprezenta orsamentu retifikativu ba PN ne’e hodi finansia programa  hamutuk 13 ne’ebé maka Governu aprova ona hanesan kriasaun subsídiu ba veteranu sira, pagamentu subsídiu $ 200 ba uma-kain sira iha fulan-dezembru 2022 no seluk tan.

“Hanesan pagamentu $200 ba uma-kain sira iha dezembru ne’e, Ministériu ne’ebé tutela maka Ministériu Administrasaun Estatál (MAE), ida ne’e maka ita foin transfere sai,”Ministru Finasas Rui Gomes dehan.

“Ami aprezenta mai iha ne’e, Parlamentu atu tetu maka adisionál no sub-plementu no osan sira ne’e ita sei tau hamutuk iha dotasaun todu Governu,” Nia esplika.

Iha fatin hanesan Prezidente PN, Aniceto Longuinhos Guterres Lopes, informa sei baixa ba Komisaun C Komisaun Espesializada iha  Parlamentu nasionál hodi halo apresiasaun.

“Maibé Orsamentu Retifikativu ne’e Governu husu prioridade urjensia, entaun Parlamentu tenke apresia uluk pedidu urjensia ho prioridade ne’e,” nia dehan.

Governu husu ba PN atu halo diskusaun ho karakter urjénsia, maibé meja Parlamentu Nasionál sei baixa ba komisaun espesializada atu halo audensia ho lina ministerial sira antes haruka ba plenaria hodi halo diskusaun no aprovasaun.

“Ida ne’e tanba karakter urjénsia parese loron ida ka rua ba debate jeneralidade, no loron tolu ka haat ba espesialidade,”Prezidente Parlamentu Nasionál Aniceto Longuinhos Guterres Lopes hateten.

Tuir nia PN sei buka atu halo diskusaun ho karakter urjénsia ba proposta ezekutivu ne’e hodi aprova antes mandate Prezidente Repúblika Francisco Guterres Lú Olo ninia mandatu sei remata iha loron 20 fulan-maiu 2022.

Entretantu, proposta orsamentu retifikativu ne’ebé maka Governu submete ba PN atu finansia programa hamutuk 13 ne’e mak hanesan tuir mai.

1.Atribuisaun osan fulan da-13 ba kada família (esetu funsionáriu públiku sira);

2.Projetu Uma Kbiit Laek Plus;

3.Bolsu Estudu ba Mellór Graduadu Estudante Ensinu Báziku no Sekundáriu;

4.Kriasaun Fundu Veteranu;

5.Programa Maun do obra ba Postu Administrativu (PEMOPA);

6.Hari’i Sede Arte Marsiál no Rituál;

7.Programa Ensinu Distánsia (Eskola iha Uma);

8.Internet gratis iha eskola sira;

9.Empregu ba mellór alunu universitáriu sira;

10.Estabelesimentu Sekretariadu ba Assuntu Traballadór Esteriór no Komunidade Timoroan iha Diáspora;

11.Revitaliza kafé no subsídiu ba kafé Laku-teen;

12.Subsídiu akomodasaun ba PNTL no F-FDTL;

13.Pagamentu ba diferensa remunerasaun PNTL nian ho rejime salariál foun, ho totál benefisiáriu 4.096.

Enkuantu,antes ne’e montante tetu OJE 2022 ne’ebé Governu submete ba PN ho montante billaun $1,675, ne’ebé millaun $233 ba saláriu no vensimentu, millaun $449,98 ba bens servisu, millaun $565,9 ba transferénsia públika, millaun $24,4 koresponde ba kapitál menór no millaun $401,7 ba kapitál dezenvolvimentu.

Maibé liuhosi debate espesialidade iha proposta adisionál mai ho propsota hamutuk 165 reprezentante povu no hosi proposta hirak ne’e mak halo adisionál millaun $300-resin, nune’e halo tetu OJE 2022 sa’e ba billaun $2 tanba atu utiliza ba nesesidade povu no nasaun.

𝗚𝗼𝘃𝗲𝗿𝗻𝘂 𝗦𝘂𝗯𝗺𝗲𝘁𝗲 𝗯𝗮 𝗣𝗡 𝗣𝗿𝗼𝗽𝗼𝘀𝘁𝗮 𝗢𝗝𝗘 𝗥𝗲𝘁𝗶𝗳𝗶𝗸𝗮𝘁𝗶𝘃𝘂 𝟮𝟬𝟮𝟮 𝗵𝗼 𝗺𝗼𝗻𝘁𝗮𝗻𝘁𝗲 𝗯𝗶𝗹𝗹𝗶𝗮𝘂𝗻 $𝟭,𝟭 𝗵𝗼𝗱𝗶 𝗙𝗶𝗻𝗮𝗻𝘀𝗶𝗮 𝗠𝗲𝗱𝗶𝗱𝗮𝘀 𝗞𝗼𝗺𝗽𝗹𝗲𝗺𝗲𝗻𝘁𝗮́𝗿 𝟭𝟯

Díli, 27 abril 2022 – Ministru Rui Gomes, ohin lokraik, aprezenta ona ba Parlamentu Nasionál, Proposta Orsamentu Jerál Estadu (OJE) Retifikativu 2022 ho montante totál $1.129.857.250. Proposta Orsamentu Retifikativu ne’e aprezenta ba Parlamentu Nasionál ho karakter urjénsia.

𝗗𝗲𝘀𝗽𝗲𝘀𝗮𝘀 𝘁𝘂𝗶𝗿 𝗞𝗹𝗮𝘀𝗶𝗳𝗶𝗸𝗮𝘀𝗮𝘂𝗻 𝗘𝗸𝗼𝗻𝗼́𝗺𝗶𝗸𝘂

Ho Proposta Orsamentu Retifikativu ne’e siginifika Reseitas Konsolidada Setór Públiku Administrativu sa’e ba $3.234.522.481, enkuantu Despesas Konsolidada Setór Públiku Administrativu sa’e ba $3.233.908.681. Reseitas husi Órgaun Servisus Administrasaun Sentrál sa’e ba $2.987.140.197, enkuantu Despesas Órgaun Servisus Administrasaun Sentrál sa’e ba $2.987.140.197, ne’ebé fahe tuir kategoria klasifikasaun ekonómiku hanesan tuir-mai ne’e: i) Transférensia Públika ho montante $1.837.634.189; ii) Bens no Servisus ho montante $466.877.382; iii) Kapitál Dezenvolvimentu $390.177.399; iv) Saláriu no Vensimentu $250.537.130; no Kapitál Menór $41.914.097.

𝗔𝗹𝗼𝗸𝗮𝘀𝗮𝘂𝗻 𝗢𝗿𝘀𝗮𝗺𝗲𝗻𝘁𝘂 𝘁𝘂𝗶𝗿 𝗠𝗲𝗱𝗶𝗱𝗮𝘀 𝗞𝗼𝗺𝗽𝗹𝗲𝗺𝗲𝗻𝘁𝗮́𝗿 𝟭𝟯

Proposta Orsamentu Retifikativu ho montante billiaun $1,1 ne’e sei uza hodi finansia medidas komplementár hamutuk sanulu-resin-tolu ho nia detalla hanesan tuir-mai ne’e: i) Kriasaun Fundu Veteranu ho orsamentu alokadu billiaun $1; ii) Atribuisaun Pagamentu Decimo Terceiro $200 ba kada família (exeptu funsionáriu públiku sira) ho orsamentu alokadu millaun $70; iii) Uma Kbiit Laek Plus ho orsamentu alokadu millaun $25; iv) Bolsa Estudu ba Mellór Graduadu Estudante Ensinu Báziku no Sekundáriu ho orsamentu alokadu millaun $7,5; v) Programa Mão de Obra ba Postu Administrativu, millaun $7,2; vi) Revitaliza kafé no subsídiu ba kafé Laku-teen ho orsamentu alokadu millaun $6,4; vii) Pagamentu ba diferensa remunerasaun PNTL nian ho rejime salariál foun, ba membru PNTL 4.096 ho orsamentu alokadu millaun $5,1; viii) Harii Sede Arte Marsiál no Rituál millaun $2,5; ix) Programa Eskola iha Uma ho orsamentu alokadu millaun $2,1; x) Internet gratuita iha eskola sira, millaun $1,1; xi) Subsídiu akomodasaun ba PNTL no F-FDTL ho orsamentu alokadu millaun $1,9; xii) Estabelesimentu Sekretaria ba Asuntu Traballadór Esteriór no Komunidade Timoroan iha Diáspora $500 mil; xiii) Empregu ba mellór alunu universitáriu sira $437,5 mil.

Liuhusi Proposta Orsamentu Retifikativu ne’e, Governu propoin ba Parlamentu Nasionál atu halo reforsu finanseiru ba iha títulu Dotasaun Ba Governu Tomak no kria Programa Foun hanaran Medidas Orsamentu Komplementár. Ida-ne’e Governu halo atu labele bok ka muda estrutura orsamentu pur programa.

Horiseik, Konsellu Ministrus aprova ona Proposta Orsamentu Retifikativu ho ninia medidas konjuntu hamutuk sanulu-resin-tolu ne’ebé Governu aprezenta ho intensaun atu redus impaktu ekonómiku ba Timoroan sira kauza husi situasaun ekonómiku internasionál no aumentu substansiál taxa inflasaun ne’ebé sa’e ba beibeik. *

Jornalista: Natalino Costa

Editór      : Agapito dos Santos

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here