EDTL instala iluminasaun iha estrada área Taibesi, Dili. Imajen/Mídia MOP-EDTL

DILI, 27 abril 2022 (TATOLI)—Ministru Obra Públika, Abel Pires da Silva, garante iluminasaun kapitál Dili funsiona normál iha loron restaurasaun independénsia ba dala-XX (20 maiu 2022-20 maiu 2022) ne’ebé sei hala’o iha Tasi-Tolu, Dili.

Notísia Relevante: MOP orienta EDTL, E.P normaliza iluminasaun iha kapitál Dili

“Ha’u garante iluminsaun kapitál Dili funsiona normál iha selebrasaun 20 maiu, tanba ida-ne’e eventu boot, eventu ida-ne’ebé tinan 20 ita ukun an, ne’ebé ida-ne’e importante ba ami,” Abel Pires da Silva hateten ba Agênsca Tatoli, hafoin partisipa iha reuniuan Konsellu Ministru (KM) iha Pálasiu Governu, Dili, kuarta ne’e.

Komisáriu Ezekutivu Servisu Tékniku EDTL, Latino Jerónimo, hateten iluminasaun públika iha kapitál Dili fulan tolu liubá EDTL halo konkursu públiku, kompañia Vinot Patel mak sai vensedór maibé iha fulan tolu (3) nia laran kompaña manan atrazu hatama sasán, nune’e EDTL fó karta xamada ba sira dala rua atu hatama ekipamentu sira-ne’e sedu.

“Tanba ne’e, ami bolu sira mai halo deklarasaun ida no sei hatama sasán iha abríl, to’o ikus sasán sira-ne’e tama ona iha semana kotuk no fó ona amostra neen (6) tama ona,” nia informa.

Iha semana ne’e nia laran, nia dehan, sira sei hatama tan iluminasaun (lampu) sira-ne’e mai, atu ba monta iha fatin sira-ne’ebé mak EDTL identifikadu lampu aat, liu-liu iha Cristo Rei mai to’o iha Jardin Ponte Prezidente B.J Habibie, Timor Plaza mai to’o Praia dos Coqueiros, Aitarak Laran ba to’o Rotunda Nicolau Lobato, Embaixada Portugal mai to’o Kolmera no iha Delta Nova tesik mai Elemloi.

Bainhira sasán sira tama hotu ona mai EDTL, ekipa sira tun kedas ba monta tanba daudaun ne’e tékniku sira preparadu ona iha fatin atu ba monta iha fatin ne’ebé identifikadu.

“Ita espera antes komemorasaun 20 maiu, ita hakas an hodi kompleta no troka hotu kedas ba lampu sira-ne’ebé aat iha estrada protokolu sira,” nia dehan.

Iha fatin seluk, Lokál no Administrasaun Purchasing Empreza Vinot Patel, Angel Lemos, hateten sasán sira mai tarde tanba ho situasaun COVID-19, halo sira labele hatama sedu ekipamentu sira-ne’e tanba ekipamentu sira-ne’e la’ós sosa iha Indonézia de’it maibé sosa mós iha fatin seluk, tanba ne’e nia lori tempu uitoan.

Maske nune’e, sasán sira-ne’ebé sosa mak kabel, konektor, photo cel, vynil tane, pipe no clamp, no hosi sasán sira-ne’e sosa iha Indonézia no China.

“Sasán sira-ne’e, iha tersa-feira (26/04), EDTL mai halo ona inspesaun no horisehik ami delivery ona sasán hamutuk 1.700 ba iha EDTL,” nia informa.

Entretantu, Kompañia Vinot Patel asina kontratu iha 21 dezembru 2021 ho totál orsamentu $580,054 ho nia durasaun fulan tolu, hodi halo akizisaun ba ekipamentu iluminasaun públiku mai Dili atu EDTL, E.P monta.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here