DILI, 27 abríl 2022 (TATOLI)—Diretora Sekretariadu Tékniku Programa Nasionál Dezenvolvimentu Suku (PNDS), Claudinha Soares Pinto, informa konstrusaun Uma Kbiit Laek (UKL) 2021 iha Munisípiu Aileu, Liquiça no Manufahi ne’e finaliza tiha ona.
“Ita bele dehan munisípiu tolu ne’e 100% tanba fizikamente konstrusaun uma kbiit laek konklui ona maibé ita seidauk entrega ba benefisiáriu sira. Ita hakarak atu entrega ona ba ita-nia benefisiáriu sira maibé benefisiáriu mak lakohi no sira hakarak Governu mak entrega, tanba ida-ne’e hanesan kontente ida ba sira no sira mós hakarak hato’o agradesmentu ba Governu tanba bele ajuda ona sira,” Diretora PNDS ne’e relata ba Agência TATOLI, iha nia knar fatin, Colmera, Dili, kuarta ne’e.
Fizikamente mak bele dehan 100% ona maibé iha sistema PNDS nian seidauk bele dehan 100% tanba sistema seidauk akapta, no bainhira Governu entrega ba na’in ona ka benefisiáriu mak bele hateten 100% ona tanba sistema akapta ona.
Semana oin, Governu liuhosi Ministériu Administrasaun Estatál (MAE) sei entrega Uma Kbiit Laek (UKL) balun iha postu adminiatrativu Remexio, munisípiu Aileu nian entaun bele dehan konklui hotu ona.
Konstrusaun Uma Kbiit Laek iha munisípiu tolu mak finaliza ona no maiória atu konklui ona, tanba hela pursentu natón de’it mak uma 19 seidauk konstrui tanba nia problema prinsipál mak labele aseseu dalan hodi transporta materiál konstrusaun atu konstrui UKL ne’e.
“Ami re-dezeñu fali uma ho métodu implementasaun foun ba uma 19 ne’ebé atu konstrui iha área rurál ne’ebé fatin ne’e labele asesu dalan no susar transporta materiál konstrusaun atu konstrui Uma Kbiit Laek refere,” Claudinha Soares hateten.
Konstrusaun Uma Kbiit Laek 19 ne’ebé seidauk konstrui ne’e nia dezeñu sei la hanesan ho ida uluk tanba PNDS hakarak halo uma simples, nune’e nia orsamentu tenke aloka barak ba mobilizasaun materiál ba benefisiáriu nia fatin.
“Agora ami halo uma 19 ne’e simples de’it tanba ami atu aloka osan barak ba mobilizasaun traballadór para selu ema hodi lalin materiál kontrusaun tanba dalan ladi’ak, nune’e aloka osan atu bele aluga kuda, se lae ita bele aluga ema lori sasán to’o benefisiáriu nia fatin ne’e,” nia dehan
Konstrusaun Uma Kbiit Laek (UKL) ba faze dahuluk nian ne’e, Governu prevee orsamentu rihun $25 ba uma 1.254 ne’ebé konstruu iha territóriu nasionál.
Jornalista : Osória Marques
Editór : Cancio Ximenes
