Diretór Jerál STAE, Acilino Manuel Branco. Imajen Tatoli /Egas Cristóvão

DILI, 27 abríl 2022 (TATOLI)–Diretór Jerál Sekretariadu Tékniku Administrasaun ELeitorál (STAE), Acilino Manuel Branco, hateten STAE sei selu ofisiál eleitorál hamutuk 15.000 iha territóriu nasionál ho orsamentu kuaze millaun $1,4.

“Ita sei selu ofisiál eleitorál sira hotu ne’ebé mak durante ne’e halo servisu iha prosesu eleisaun prezidensiál 2022 nian iha aban ka bainrua, tanba daudaun ne’e osan iha ona munisípiu sira,” Diretór STAE ne’e hateten ba Agência TATOLI, liuhosi telefónika, kuarta ne’e.

Tanba, nia dehan, durante feriadu semana ida ba paskua nian ne’e STAE labele prosesa maibé ohin STAE konfirma katak aban ofisiál sira sei simu sira-nia direitu ba servisu ne’ebé mak durante ne’e sira hala’o.

“Tan feriadu ba paskua nian ne’ebé to’o semana ida, nune’e halo prosesu ne’e atraza uituan. Maibé, ami halo konfirmasaun ho Ministériu Finansa katak osan transfere ona ba iha munisípiu sira para halo ona pagamentu,” nia informa.

Relasiona ho preokupasaun komunidade katak pagamentu ba ofisiál eleitorál ne’ebé servisu iha eleisaun prezidensiál primeira volta no segunda volta ne’ebé seidauk selu, responsável ne’e hatán, eleiaun primeira volta ne’e STAE selu ona ba ofisiál eleitorál sira molok tama ba segunda volta.

“Ba primeira volta ita selu kedas ona iha momentu ne’ebá, tanba tempu la’o normál no segunda volta ne’e aban selu ona,” nia dehan.

Jornalista : Osória Marques

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here