Ilustrasaun pasiente dengue. Imajen/Espesiál

VIQUEQUE, 26 abril 2022 (TATOLI)—Xefe Sentru saúde postu Viqueque Vila, Celestina da Costa Alves, informa, sentru saúde rejista kazu dengue hamutuk 31 iha fulan-abril nia laran.

”Hosi fulan-janeiru to’o marsu kazu dengue hamutuk 75, hafoin númeru kazu ne’e redus tiha, maibé daudaun ita hahú rejista kazu dengue iha fulan-abril hamutuk 31 kompostu hosi feto 14 no mane 17,” Xefe Sentru Saúde hateten ba Agência Tatoli, iha ninia knaar fatin, Viqueque, tersa ne’e.

Notísia relevante: Surtu dengue: pasiente na’in-4.299 no mate 50

Hosi kazu rejistadu, maioria hanesan labarik ho idade 5 mai karik, ne’ebé pasiente sira daudaun kontinua baixa iha internamentu.

“Ami esforsu halo prevensaun dengue liuhosi konvida komunidade postu Viqueque Vila halo limpeza jerál, hafoin halo fumigasaun iha bairru sira ne’ebé risku liu ba moras dengue. Aimoruk fumigasaun daudaun sufisiente hela,” nia akresenta.

Nune’e, nia husu ba komunidade hodi kuidadu oan sira bainhira halimar iha li’ur.

“Karik iha bee-fatin mamuk ka lata mamuk labele soe arbiru, maibé tenki tau iha fatin lixu no hamos bee ne’ebé nalihun besik uma, tanba susuk ne’e moris iha bee-laran,” nia hato’o.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here