Sesaun traballu planeamentu OJE 2023, iha auditóriu Ministériu Finansa, tersa (26/04). Imajen Tatoli/Francisco Sony

DILI, 26 abril 2022 (TATOLI)-Membru VIII Governu Konstitusionál inklui entidade kada instituisaun Estadu, segunda ne’e, durante loron ida, halibur hamutuk iha sesaun traballu Jornada Planeamentu hodi rona aprezentasaun ekipa Diresaun Jerál Planeamentu no Orsamentu hosi Ministériu Finansa (MF) kona-ba mekanizmu elaborasaun orsamentu ba tinan oin.

Iha sesaun diskusaun no apresiasaun ba medida prinsipál ba Orsamentu Jerál Estadu (OJE) 2023, Governu deside senáriu fiskál ho montante biliaun $1,797.6

Ministru Finansa, Rui Augusto Gomes, halo aprezentasaun iha Jornada Planeamentu, iha auditóriu MF, Aitarak-laran, tersa (26/04). Imajen Tatoli/Francisco Sony

“Sorumutuk ne’e nu’udar pontu partida hosi prosesu planeamentu no elaborasaun Lei das Grande Opções do Plano, ne’ebé tuir ona espíritu lei foun Enkuadramentu Orsamentál, ne’ebé Prezidente Repúblika promulga ona iha fevereiru 2022,” Ministru Finansa, Rui Augusto Gomes, hateten hafoin ramata atividade iha auditóriu MF, Aitarak-laran.

Lei 𝘎𝘳𝘢𝘯𝘥𝘦𝘴 opções 𝘥𝘰 𝘗𝘭𝘢𝘯𝘰 hanesan medida prinsipál ba (OJE) 2023, ne’ebé iha sesaun ne’e aprezenta mós kona-ba previzaun makro-ekonómiku no makro-fiskál ba tinan 2022 no 2023.

Notísia relevante: Governu realiza jornada planeamentu hodi identifika medida prinsipál OJE 2023

Ministru dehan, ho promulgasaun Lei Estruturante, Timor-Leste marka pasu importante dahuluk iha área Reforma Fiskál no Jestaun Finansa Públika no hanesan konkista boot ida ba VIII Governu Konstitusionál.

Sesaun traballu planeamentu OJE 2023, iha auditóriu Ministériu Finansa, tersa (26/04). Imajen Tatoli/Francisco Sony

Ba oin, MF sei komtempla medida hirak ne’e iha Proposta Projetu Lei das Grandes Opções do Plano no sei aprezenta iha Konsellu Ministru iha loron 04 maiu 2022 atu hetan apresiasaun no hafoin hetan ona aprovasaun, Governu sei aprezenta ba Parlamentu Nasionál (PN) iha loron 10 maiu 2022 hodi diskute no aprova.

Nune’e, preparasaun iha nível tékniku ba Proposta Projetu Lei das Grandes Opções do Plano la’o intensivamente durante fulan-ida ho balun, ne’ebé envolve rekollamentu medida setoriál no konsultasaun téknika ho entidade Estadu hamutuk 98 ne’ebé hola parte iha perímetru orsamentál.

MF mós halo ona analiza ba medida hosi entidade hirak ne’e, hodi asegura katak medida sira aliña ho Planu Estratéjiku Dezenvolvimentu, Programa VIII Governu Konstitusionál, Planu Estratéjiku Setorál, Planu Rekuperasaun Ekonómiku no dokumentu estratéjiku seluk ne’ebé aprovadu inklui mós halo aliñamentu ba Rezultadu Nasionál (National outcomes) ne’ebé daudaun  ANAPMA dezenvolve hela.

“Ezersisiu ne’e foun no komplexu tebes, maibé ho esforsu tomak hosi Diresaun Jerál Planeamentu no Orsamentu hosi Ministériu Finansa ho koordenasaun ho ANAPMA, ohin ita bele hetan rezultadu ezbosu planeamentu tuir espíritu lei foun Enkudramentu Orsamentál. Parabéns ba ekipa tomak hosi Diresaun Jerál Planeamentu no Orsamentu no ANAPMA,” Ministru apresia.

Sesaun traballu planeamentu OJE 2023, iha auditóriu Ministériu Finansa, tersa (26/04). Imajen Tatoli/Francisco Sony

Sorumutuk ne’e prezide direta hosi Primeiru-Ministru, Taur Matan Ruak no modera hosi Ministru Finansa, Rui Gomes, ne’ebé hanesan Jornada Planeamentu dahuluk iha istória Timor-Leste, ne’ebé VIII Governu Konstitusionál realiza hafoin restaura independénsia iha tinan 20 liubá.

Aleinde ne’e, sesaun traballu ne’e organiza hosi Diresaun Jerál Planeamentu no Orsamentu hosi MF serbisu hamutuk ho Ajénsia Nasionál ba Planeamentu, Monitorizasaun no Avaliasaun (ANAPMA), ne’ebé semináriu loron ida-ne’e nia objetivu prinsipál mak atu diskute no identifika medida prinsipál ba OJE 2023 hodi rekupera ekonomia no promove kresimentu ekonómiku ne’ebé inkluzivu no sustentável.

Entidade ne’ebé partisipa iha biban ne’e mak hanesan Prezidente Autoridade, Administradór munisípiu, Responsável Instituisaun Estadu, Órgaun Servisu Fundu Autónoma, Diretór Jerál hosi liña ministeriál inklui tékniku sira.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here