Ministru Prezidénsia Konsellu Ministru, Fidelis Manuel Leite Magalhães. Imajen Tatoli/Francisco Sony

DILI, 26 abril 2022 (TATOLI)-Taxa ezekusaun reál Orsamentu Jerál Estadu (OJE) 2022 to’o loron 13 marsu 2022, atinje ona millaun $160,8 (8%) hosi totál alokasaun biliaun $1,967, ne’ebé montante ne’e esklui orsamentu ba Institutu Nasionál Seguransa Sosiál (INSS).

“Konsellu Ministru rona aprezentasaun hosi Ministériu Finansa Kona-ba ezekusaun OJE 2022 durante trimestre dahuluk. Ida-ne’e tuir Lei Orsamentu Jestaun Finanseira ezije katak tenki halo aprezentasaun ba Konsellu Ministru,” Ministru Prezidénsia Konsellu Ministru, Fidelis Manuel Leite Magalhães relata hafoin reuniaun ezekutivu extraordinária iha auditorium Ministériu Finansa, Aitarak-laran, tersa ne’e.

Notísia relevante: PN aprova proposta OJE 2022 billaun $2 iha finál globál

Taxa ezekusaun reál tuir klasifikasaun ekonómiku a’as liu mak iha kategoria saláriu no vensimentu ne’ebé ezekuta ona millaun $60,5 ka 24% hosi orsamentu alokadu millaun $256,9.

Tuir kedan ho bens no servisu ne’ebé ezekuta ona millaun $46,4 ka 9% hosi orsamentu alokadu millaun $503,4, transferénsia públiku ezekuta ona millaun $49,6 ka 7% hosi orsamentu alokadu millaun $718,7, kapitál menór $206.000 ka 0,4% hosi totál kategoria millaun $46,7, enkuantu kapitál dezenvolvimentu hanesan kategoria importante ne’ebé bele fó kampu traballu no jere empregu rai-laran foin mak ezekuta de’it 1% ka millaun $4 hosi totál orsamentu alokadu millaun $442.

Ezekusaun tuir programa, durante trimestre dahuluk, mai ho persentajen ezekusaun orsamentu konsentra iha programa sira hanesan, Polítika Externu atinje 37% hosi totál orsamentu alokadu.

Tuir kedan ho programa Edukasaun no Treinamentu ne’ebé atinje 19%, programa Seguransa Nasionál iha terseira lugar ho 18%, tuir kedan ho programa Saúde 17%,  enkuantu programa Boa Governasaun no programa Desentralizasaun Administrativa nia ezekusaun atinje 15%, programa Jestaun Finanseira 14%, programa Igualdade Jeneru no Inkluzaun Sosiál 11 % no Defesa Nasionál 10%.

Ezekusaun liña ministériu to’o iha trimestre dahuluk a’as liu mak Ministériu Negósiu Estranjeiru no Kooperasaun (MNEK) ne’ebé atinje ona 33%, tuir kedan ho Prezidénsia Konsellu Ministru (PCM, sigla portugés) 26%.

“MNEK no PCM nia taxa ezekusaun ne’e liu espetativa (25%) iha trimestre dahuluk, Ministériu ba Asuntu Kombatente Libertasaun Nasionál 24%, enkuantu liña ministériu sira ne’ebé mak nia persentajen ezekusaun kiik liu iha trimestre dahuluk mak Ministériu Obra Públika 2%, Minstériu Turizmu Komérsiu no Indústria( MTKI) 2%, Sekretaria Estadu Kooperativa (SEKoop) 1% no Ministériu Petróleu no Minerál (MPM) 0,2%,” Ministru dehan.

Ezekusaun Órgaun, Servisu no Fundu Autónomu (OSFA), hanesan Sekretariadu Tékniku Administrasaun Eleitorál (STAE) atinje 39%, ne’ebé persentajen ida-ne’e mak a’as liu iha finál trimestre dahuluk entre OSFA sira.

Parlamentu Nasionál mak hanesan segunda entidade OSFA ne’ebé atinje maiór persentajen ho 20%, tuir kedan ho IPB 19%, OSFA sira ne’ebé nia persentajen ezekusaun kiik liu iha finál trimestre dahuluk mak Servisu Nasionál Ambulánsia no Emerjénsia Médika, Institutu Públiku (SNAEM, I.P) 9%, Institutu Kualidade Timor-Leste, Institutu Públiku (IQTL, I.P) 7% no Servisu Apoiu ba Sosiedade Sivil no Auditoria Sosiál (SASCAS, sigla portugés).

Taxa ezekusaun OJE 2022 iha nível munisipál hatudu progresu di’ak iha trimestre dahuluk.

To’o iha 31 marsu 2022, iha munisípiu neen mak nia ezekusaun di’ak hanesan munisípiu Manufahi 23%, Lautém 21%, Covalima, Ainaro 20%, Baucau no Liquiçá 19%.

Progresu ezekusaun ne’ebé di’ak, sei kontinua fasilita polítika desentralizasaun VIII Governu Konstitusionál.

Ezekusaun tuir mai ba kategoria Fundu Administrasaun no Autoridade Munisipál atinji 15%, ne’ebé maior persentajen ezekusaun entre Fundu hotu, tuir kedan ho Fundu OSFA 14%, Fundu Dezenvolvimentu Kapitál Umanu (FDCH, sigla portugés), Liña Ministeriál atinje 10% no Rejiaun Administrativa Espesiál Oé-cusse mbeno (RAEOA) 5%.

Fundu COVID-19 no Fundu Instraesturura (FI) nia ezekusaun mak kiik liu, foin mak atinje 3% no 1% iha trimestre dahuluk nia rohan.

Nune’e, ba oin Governu sei aselera prosesu aprovizionamentu no estabelese kontratu sira tanba importante tebes atu eleva taxa ezekusaun liuliu FI iha trimestre daruak no datoluk tanba komponente ne’e sei ajuda dudu kresimentu ekonómiku, kria empregu iha rai-laran no hadi’a imajen nasaun liuhosi dezenvolvimentu infraestrutura esensiál sira.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here