DILI, 25 abríl 2022 (TATOLI)—Parlamentu Nasionál ratifika ona ba adezaun Convenção Internacional para Evitar Abalroamento no Mar de 1972 (COLREG), nune’e Estadu Timor-Leste adere ona konvensaun refere.
“Rezultadu votasaun a-favór 45, kontra 0 no abstensaun 0, ho nune’e proposta rezolusaun númeru 8/V/4ª aprovadu,” Prezidente Parlamentu Nasionál, Aniceto Longuinhos Guterres Lopes, anunsíu iha plenária Parlamentu Nasionál, segunda ne’e.
Iha relatóriu paresér komisaun B ne’ebé trata asuntu Defeza, Seguransa no Negósiu Estranjeiru ho nia konkluzaun ba iha proposta rezolusaun aprezenta importansia ba Repúblika Demokrátika Timor-Leste (RDTL), asosia ho instrumentu save interansionál introdús prosedimentu universál evita abalroamentu iha tasi, estabelese padraun no regra navegasaun internasionál iha Timor-Leste ba roo ka navegasaun iha tasi hodi evita xoke malu entre ró rua ka liu.
RDTL konsertasaun ho komunidade internasionál relativamente ba kumprimentu norma internasionál iha mateira seguransa marítima, nune’e hasa’e padraun ho di’ak liután iha seguransa navegasaun hodi prevene róo soke malu, ho ida-ne’e Timor-Leste hanesan Estadu soberanu hakarak kumpre no asegura norma interansionál transporte marítima no salvaguarda estabilidade no seguransa iha nia zona ekonomika eskluziva.
Ho ida ne’e, komisaun rekomenda ratifika konvensaun ne’e tanba krusiál ba mekanizmu legál monitorizasaun setór marítimu nasionál iha konsertasaun ba pilár seguransa marítima.
Bainhira ratifika presiza reve otimiza no forma regularmente kona-ba kuadru jurídiku setór seguransa marítima nasionál hosi parte autoridade, relasiona rekezitu seguransa internasionál no kontrolu karga ba portu nasionál hodi identifika área nesesita alterasaun medida padraun ho di’ak liután tuir evolusaun merkadu globál.
Ne’e mós promove koordenasaun no partisipasaun ho entidade nasionál setór marítimu privadu hosi inisiativa autoridade ba asaun partilla abordajen perspektiva protokolu solídu servisu di’ak liután iha portu nasionál.
Ministru Transporte no Telekomunikasaun (MTK), José Agostinho, hateten Timor-Leste nu’udar Estadu membru ba organizasaun marítima internasionál, nune’e bainhira ratifika importante atu afirma Estadu Timor-Leste ba mundu.
‘’Kovensaun ne’e introdús norma no prosedimentu internasionál atu evita ró-ahí sira xoke malu iha tasi laran hanesan hato’o iha organizasaun marítima estabelese regra tránzitu nian ka regra navegasaun hodi bele kumpre ne’ebé mak halo envargasaun. Ne’ebé konvesaun ne’e agrupa dispozisaun sira sesaun hatudu ba dirasaun navegasaun hanesan ahí oan, sinais sonoro no sira seluk, nune’e ita bele haree loos atu garante seguransa hodi prevene ró xoke malu. Tanba ne’e nu’udar Estadu soberanu iha obrigasaun atu kontribui no kumpre regra internasionál ba transporte marítima nian,” nia dehan.
Governante ne’e kompromete ba rekomendasaun hirak ne’ebé komisaun hato’o MTK sei rejista ba iha preparasaun prosesu implementasaun bainhira konvensaun ne’e ratifika ona.
Jornalista : Nelson de Sousa
Editór : Cancio Ximenes
