Transporte para iha Estasionamentu iha área Banco Nasionál Ultramarinho (BNU) nia oin. Imajen Tatoli/Dok

DILI, 25 abril 2022 (TATOLI)—Prezidente Autoridade Munisípiu (PAM) Dili, Guilhermina Filomena Saldanha Ribeiro “Margi”, relata iha janeiru to’o marsu 2022 ne’e, Autoridade Munisípiu Dili (AMD) rekolla taxa estasionamentu hamutuk $7,488.80.

“Hosi janeiru to’o marsu tinan ne’e, munisípiu dili rekolla ona taxa estasionamentu hamutuk $7,488.80,” Guilhermina Filomena Saldanha Ribeiro “MARGI” informa ba Agência, hafoin partisipa iha serimónia entrega konstrusaun armajen, iha Matadoru, Dili, segunda ne’e.

Hosi taxda atividade estasionamentu ne’e, Autoridade Munisípiu Dili rekolla hosi estasionamentu lima (5), ne’ebé estabelese iha Dili laran ne’ebé kompostu hosi zona estasionamentu merkadu Taibesi, 25 de Abril, Avenida 20 de Maio, Avenidade Liberdade de Imprensa no Jardin 05 de Maio.

Diretora Jestaun Merkadu no Turismu Munisípiu Dili, Justina de Jejus Amaral, afirma, ofisiál estasionamentu ne’ebé durante ne’e rekolla taxa uza manuál, tanba bazea ba dekretu-lei númeru 03/2017 ne’ebé aprova kona-ba rejime zona estasionamentu durasaun limitada, no iha ne’ebá mós ko’alia kona-ba titlu estasionamentu, uza billete hodi halo kobransa ba taxa estasionamentu sira.

“Entaun, ofisiál estasionamentu iha ne’ebá fó billete ba utilizadór ka motorista sira-ne’ebé uza fatin estasionamentu tuir oras ne’ebé sira para bá, ita-nia ofisiál hakerek, nune’e fó billete no simu osan hosi ita-nia utilizadór sira,” nia esplika.

Bainhira uza billete manuál ne’e, Autoridade Munisípiu Dili seidauk hetan dezafiu iha terrenu, tanba durante uza billete ne’e la afeta ba buat ruma tanba iha kontolu.

Aleinde ne’e, iha mós administrasaun ne’ebé lor-loron rejista billete hira mak sai no osan hira mak tama, entaun hosi ne’e ita rejistradu hotu.

Maske nune’e, billete manuál ne’e seida’uk moderniza tanba haree fila-fali ba regra, hanesan tenke halo revizasaun fila-fali ba regra ka dekretu estasionamentu, nune’e bele halo fali ba eletrónika.

“Entaun, ida ne’e sei prosesu to’o fila-fali ba nível altu atu iha desizaun ruma, nune’e ita bele utiliza. Tanba, munisípiu Dili hanesan ema implementadór, ita implementa saida mak agora daudaun la’o hela, tuir dekretu-lei ne’ebé iha,” nia dehan.

Entretantu, pesoál estasionamentu hamutuk 45 mak kobre ba taxa estasionamentu iha merkadu Taibesi, 25 de Abril, Avenida 20 de Maio, Avenidade Liberdade de Imprensa no Jardin 05 de Maio.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here