Konserva bee-moos hodi hamoris fali bee-matan. Imajen/Mídia PERMATIL.

DILI, 23 abril 2022 (TATOLI)—Ministériu Obras Públika (MOP) apresia ba Perma Kultura Timor Leste (PERMATIL) ne’ebé servisu hamutuk ho komunidade hosi suku Dare hodi halo konservasaun bee-moos ne’ebé sei salva kapitál Dili hosi dezastre hanesan inundasaun no rai halai.

Ministru Obras Públika, Abel Pires, hato’o nia apresiasaun ba parseiru no komunidade ne’ebé hatudu ona sira-nia esforsu hodi ajuda governu inklui komunidade iha Dili halo prevensaun inundasaun no rai halai.

MOP kada tinan lakon osan barak hodi halo rekuperasaun iha sidade Dili Bainhira udan mai mota sobu uma, ponte no estrada sira no situasaun hanesan tenke akontese hela de’it tanba laiha prevensaun di’ak.

Ministru Obra Públika, Abel Pires. Imajen/Mídia PERMATIL.

“Ita lakon osan barak hodi hadi’a, entaun ita hanoin katak kauza ne’e tanba volume bee ne’ebé ho velosidade makaas tun ba ne’e, ba loos de’it laiha esgout ida mak atu redús. Nnune’e mak ita hanoin katak tenke halo buat ruma hodi halo prevensaun mak halo konservasaun bee’moos,” Abel Pires hateten ba jornalista sira hafoin ekipa hosi MOP halo vizita ba área konservasaun bee-moos ne’ebé halo hosi PERMATIL hamutuk ho komunidade suku Dare iha Aldeia Fatsuka, suku Dare, sesta ne’e.

Infelizmente MOP foin hanoin maibé timor-oan balun iha PERMATIL, Ego Lemos, no xefe aldeia sira iha ne’e halo ona, mak lori MOP hare’e nune’e replika no halo tuir fali sira-nia espreriénsia ne’e la’ós de’it iha fatin ida-ne’e maibé iha fatin seluk foho ne’ebé haleu Dili.

“Ha’u kontente sira halo ida-ne’e barak loos, maske hodi liman deit. Sira-ne’e mak éroi iha era ukun rasik an. Agora MOP nia papel mak apoiu totalmente,” nia dehan.

Governante ne’e promote sei informa ba parte Jestaun Ekipamentu hodi aloka ekipamentu ba iha aldeia Fatsuka hodi tulun komunidade nia servisu kria debu no halo konservasaun bee-moos barak liután.

Tinan ne’e, governu sei prepara osan hodi halo brigada ida iha Fatsuka, kria dezeñu foun hodi halo replikasaun no hafoin tempu udan liu, ekipamentu sei tun kedas hodi halo servisu no rezolve problema sira.

“Agora daudaun ne’e ita ekipamentu barak mak sei haree mota iha fatin barak, maibé tama ona tempu bailoron laiha ona razaun. Orsida sei mai iha ne’e apoia, nune’e esbosu ida agora manuál no uitoan ne’e ita halo barak liutánn,” nia dehan.

Tuir nia, banhira dezeñu mak Governu haree atu halo rekrutamentu ba joven sira liu-liu joven sira besik iha fatin ne’e hodi fó apiu la’ós de’it atu proteje sira-nia hela fatin maibé proteje komunidade hela iha kraik, no ministeriu iha orsamentu ba ida-ne’e hodi fó prioridade bainhira udan la mai ona.

Diretór Ezekutivu PERMATIL, Ego Lemos rekoñese problema bee-moos sai hanesan probelma prinsipál ida iha Timor ne’ebé presiza fó atensaun la’ós de’it iha infraestutura maibé iha mós problema rekursu bee nian, tanba laiha konservasaun ne’ebé di’ak hodi fó ameasa ba bee-matan barak maran.

“Tan ne’e mak PERMATIL foti inisiativa ida hamutuk ho autoridade lokáll, lia-nain no hamutuk ho igreja, ita koko mobiliza komunidade atu ita bele konserva rekursu bee,” nia dehan.

PERMATIL hanoin katak konservasaun bee ne’e sei hamoris fali bee-matan sira-ne’ebé fornese bee ba komunidade iha Dili, bele rezolve problema rai halai, inundasaun no bele halo rekuperasaun ekolójíku atu lori fila-fali animál fuik sira-ne’ebé durante ne’e lakon ona bele fila ba nia fatin.

Hahú hosi 2019 to’o agora, PERMATIL hamutuk ho komunidade Dare konsege reabilita no kria debu hamutuk 70 inklui hamoris bee-matan foun barak, nune’e ho vizita MOP nian espera bele hametin liután kooperasaun atu bele habelar servisu iha territóriu tomak.

Xefe aldeia Suka Lau, suku Dare, Aida de Araújo, informa suku Dare iha Aldeia 10 hanesan Casnafar, Coalau I, Coalau II, Fatu Naba, Fila Beba Tua, Fuguira/Bauloc, Leilaus, Lemorana, Nahaec no Suka Lau.

Iha suku ida-ne’e, komunidade kria grupu servisu haat (04) no tuir ona treinamentu durante loron tolu, hafoin ne’e servisu hamutuk kria debu sira durante fulan tolu no iha mós apoiu hosi joven sira-ne’ebé mai halo akampamentu no tuir treianemtnu durante loron lima.

“Hafoin tuir treianemtnu hosi PERMATIL, ami iha-ne’e la tesi-ai no sunu-rai nune’e área ne’e sai matak malirin la’ós ba ita ema de’it maibe ba animál móos. Antes ne’e komunidade mak iha problema ba bee no liuhosi programa PERMATIL nian laiha ona komunidade ne’ebé istória  malu ba bee no ida-ne’e mak benefísiu mak ami-nia suku Dare aldeia sia, aldeia Casanafar mak lae tanba distánsia dook,” nia hateten.

Jornalista : Cidalia Fátima

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here