Prezidente ANPM, Florentino Soares Ferreira. Imajen Tatoli/Francisco Sony

DILI, 22 abril 2022 (TATOLI)—Autoridade Nasionál Petróleu no Minerál (ANPM) identifika ona estasaun kombutível hotu iha teritóriu laran bele simu troka voucher subsídiu kombustível ba operadór transporte rodoviáriu públiku.

Kestaun ne’e liga ho promulgasaun dekretu-lei kona-ba atribuisaun subsídiu kombustível ba operadór transporte rodoviáriu públiku, transporte aéreu no marítimu nasionál, inklui adkirente kombustível destinadu ba atividade agríkola no piskatória, ne’ebé tempu badak Governu sei implementa.

“Daudaun ne’e ANPM ho parte relvante halo esforsu iha tempu badak sei implementa dekretu ne’e. Ha’u hanoin ita identifika estasaun kombustível hotu bele simu voucher. Bainhira operadór transporte uza voucher ba enxe mina sira sei hetan folin normál, enxe hotu mak lori voucher ba Governu hodi selu, ne’ebé estasaun kombustível iha Timór laran tomak bele simu,” Prezidente ANPM, Florentino Soares Ferreira, informa ba Agência Tatoli iha Suai Room, Timor Plaza, sesta ne’e.

Notísia relevante: Governu hahú implementa programa subsídiu kombustível semana oin

Governu kria subsídiu ba operadór transporte rodaviáriu públiku sira tanba haree ba folin mina ne’ebé hahú sa’e tanba impaktu hosi COVID-19 no funu entre Rúsia no Ukránia.

“Liuhosi subsídiu ne’e bele fasilita operadór transporte no ajuda povu kiik sira hodi hala’o nafatin sira-nia atividade,” nia akresenta.

Daudaun ne’e ANPM halo ona preparasaun hamutuk ho instituisaun relevante sira hanesan Ministériu Agrikultura no Peska (MAP), Ministériu Transporte no Komunikasaun (MTK) inklui instituisaun diteita no indireita ba implementasaun subsídiu kombustível.

“Implementasaun dekretu ne’e envolve servisu interministeriál tanba dadus hotu sei mai hosi instituisaun relevante sira. ANPM hanesan reguladora ba mina de’it,” nia dehan.

Jornalista : Arminda Fonseca

Editor       : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here