PNTL RAEOA kontinua buka-tuir suspeitu sunu uma iha Ban-Afi, RAEOA. Imajen espesiál.

OÉ-CUSSE, 21 abríl 2022 (TATOLI) – Polísia Nasionál Timor-Leste (PNTL), sei kontinua buka-tuir suspeitu ne’ebé sunu mutuk inan faluk Lúcia Poto, nia uma hela fatin iha aldeia Kuanobe suku Ban-Afi, sub-rejiaun Nítibe, Rejiaun Administrativa Espesiál Oé-Cusse Ambeno (RAEOA).

Komandante PNTL RAEOA, Superintendente Xefe, Mateus Assunção Mendes, hateten, inisidente ne’e akontese iha loron kuarta, 21 fuan-abríl, tuku 03:00 madrudaga, no família vítima informa kedas ba Ofisiál Polísia Suku Ban-Afi, hodi hato’o ba kamandu atu halo asaun ruma.

“Ha’u-nia ekipa investigasaun dezloka tiha ona horisehik ba iha fatin akontesimentu ne’e, karik to’o ne’ebá iha ema rua sai suspeitu, ami sei foti asaun nune’e bele prevene, karik situasaun sira-ne’e labele mosu tán iha futuru,” Mateus Assunção Mendes, informa ba jornalista sira iha aeroportu Rota do Sândalo, Oé-Cusse, kinta ne’e.

Nia informa, insidente ne’e akontese hafoin eleisaun remata to’o apuramentu munisipál maka akontese, tán ne’e PNTL liuhosi servisu invetigasaun sei kontinua buka-tuir, karik iha ema ruma mak suspeitu, parte PNTL sei identifika no halo investigasaun hodi hatene loloos kronolojia hosi kazu ne’e.

Hafoin insidente ne’e akontese iha loron kuarta 20 abríl, madrugada tuku 03:00, uma na’in inan faluk, Lúcia Poto, nia ona mane, Januário Tout, públika kedas insidente ne’e iha mídia sosiál, katak, iha ema deskoñesidu sunu mutuk nia inan nia uma.

“Ha’u la hatene tanba saida mak ema deskoñesidu mai sunu ha’u-nia inan nia uma iha dadeersan ne’e, labuat ida tanba ne’e akontese ona no uma mós mutuk ona,” nia katak.

Xefe aldeia Kuanobe, Jorge Lalus, informa, insidente ne’e, autoridade komunitáriu suku Ban-Afi, relata ona ba iha parte relevante sira atu fornese apoia umanitária ba vítima.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here