Vise-Ministru Turizmu Komérsiu no Industria, Domingos Lopes Antunes. Imajen Tatoli/Egas Cristóvão

DILI, 21 abril 2022 (TATOLI)—Vise-Ministru Turizmu Komérsiu no Indústria (MTKI), Domingos Lopes Antunes, informa, hahú hosi janeiru to’o abril tinan ne’e iha empreza 11 mak submete ona aplikasaun atu asesu kréditu suave.

“Diresaun Nasionál Apoiu Dezenvolvimentu Mikro, Pekena no Média Empreza rejistu hosi janeiru to’o abril iha empreza na’in 11 mak submete sira-nia dokumentu aplikasaun ba kréditu suave. Ida-ne’e foin submete bainhira ita haree sira prienxe ona kritériu mak ita fó kréditu,” Vise-Ministru hateten ba Agência Tatoli iha ninia knaar fatin, Bebora, sesta ne’e.

Prezidente Repúblika promolga dekretu-lei númeru 8/2022, 16 fevereiru kona-ba fasilidade garantia kréditu suave, nune’e hahú implementa ona iha tinan kotuk no kontinua ba tinan ne’e, ne’ebé programa ne’e ho intensaun fó kréditu funan kiik ba maluk sira ne’ebé hakarak halo negósiu iha área produtivu hanesan turizmu, peska, agrikultura, indústria no seluk tan.

“Ita kontinua nafatin loke ba maluk sira ne’ebé hakarak halo kréditu ho funan kiik tanba ita sei iha fundu garantia iha banku hamutuk $1.380.330, kompostu fundu hosi United Nations Development Programme (UNDP) $480.000 no MTKI $900.000,” nia akresenta.

Notísia relevante: Empreza na’in-23 sai ona benefisiáriu programa kréditu suave hosi MTKI

Kréditu sei fó ba ema hahú hosi $1.000 to’o $25.000, ne’ebé karik tinan ne’e ema ne’ebé halo planu negósiu atu foti osan hosi $25.000, ita iha alvu fó ba benefisiáriu na’in-55, tanba orsamentu iha banku boot hela, maibé mai ho planu negósiu foti osan $1.000-$20.000 de’it ne’e bele liu ema 55 tanba sira foti osan kiik,” nia akresenta.

Nune’e, governante ne’e enkoraja joven no negosiadór sira ne’ebé hakarak halo negósiu hahú hosi turizmu, peska, agrikultór no seluk tan, iha oportunidade boot bele asesu ba kréditu suave tanba oportunidade ne’e loke tinan tomak.

Kritéria asesu kréditu suave ba empreza foin atu hahú mak hanesan utiliza formatu cover letter ne’ebé sekretariada prepara, planu negósiu formalizadu hosi Institutu Apoiu Dezenvolvimentu Emprezariál (IADE), empreza legalizadu hosi Servisu Rejistrasaun no Verifikasaun Emprezariál, Institutu Públiku (SERVE, I.P), kartaun Identidade Eleitorál no Billete Indentidade, inklui empreza ho forma limitadu presiza iha estatutu empreza.

Dokumentu seluk, sertifikadu formasaun ka kounsultoria emprezariál hosi IADE, lista inventáriu ne’ebé atu sosa, detallu kustu invetimentu, prova nain ba rai ka dokumentu asset seluk nu’udar garantia ba kréditu ka deklarasaun guarantór.

Nune’e, kritéria ba ne’ebé empreza eziste atu asesu ba kréditu suave ne’e mak hanesan utiliza formatu cover letter ne’ebé sekretariada prepara, planu negósiu formalizadu hosi IADE, empreza legalizadu inklui kopia dokumentu hotu hosi SERVE, I.P, empreza ho forma limitada presiza iha estatutu empreza nian, kréditu hahú hosi $1.000 to’o $25.000.

Nune’e mós, tenke iha sertidaun dívida, kartaun Identidade Eleitorál no Billete Identidade, ho montante kréditu hahú hosi $1.000 to’o $25.000, konta bankária iha Banku Nasionál Komérsiu Timor-Leste (BNCTL, sigla portugés), relatóriu finanseiru, estatutu banku iha BNCTL ka banku seluk, inklui dokumentu seluk hanesan sertifikadu formasaun konsultória emprezarial hosi IADE, lista inventáriu ne’ebé atu sosa, prova na’in ba rai ka dokumentu asset seluk nu’udar garantia kréditu ka deklarasaun guarantór.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan