Diretór STAE Munisípiu Baucau, Lúcio Freitas Salvador. Imajen Tatoli/Natalino Belo.

BAUCAU, 20 abríl 2022 (TATOLI) – Sekretariadu Tékniku Administrasaun Eleitorál (STAE) Munisípiu Baucau, rejista krime eleitorál tolu ne’ebé akontese durante realizasaun eleisaun prezidensiál volta daruak iha loron 19 abríl.

Diretór STAE Baucau, Lúcio Freitas Salvador, esplika krime tolu ne’e akontese iha área Uai-aca, suku Uaitame, suku Maluru, postu administrativu Quelicai no suku Caibada, postu administrativu Baucau Vila.

STAE Baucau simu informasaun iha loron 18 abríl durante prosesu transportasaun materiál eleisaun mosu tentativa bainhira joven balun ho kondisaun lanu tenta halo perturbasaun iha sentru votasaun Uai-aca, suku Uaitame, postu administrativu Quelicai.

Nune’e mós iha loron 19 abríl iha suku Maluru, postu administrativu Quelicai mosu insidente bainhira joven balun ho kondisaun lanu tenta hamosu perturbasaun iha fatin votasaun maibé parte seguransa konsege hakalma situasaun.

Iha loron hanesan, akontese eleitór balun tama iha kabina votu foti imajen fotografia maibé brigadista deteta iha sentru votasaun Eskola Baziku Filiál (EBF) númeru-ualu, Suku Caibada, postu administrativu Baucau Vila.

“Kazu hirak-ne;e konsege rezolve hotu no submete ona ba iha komandu PNTL,” Diretór STAE Baucau hateten iha Vila Nova, kuarta ne’e.

Komandante Polísia Nasionál Timor-Leste (PNTL) Munisípiu Baucau, Superintendete António de Sá, hateten iha loron 18 abríl mosu insidente kazu tá vítima inisiál VGV idade 55 hosi ema deskoñesidu iha aldeia Ledana, suku Lawateri, postu administrativu Baguia ne’ebé rezulta vítima kanek iha parte ulun no daudaun ne’e hala’o tratamentu iha Hospitál Rejionál Eduardo Ximenes Baucau.

Iha loron hanesan, bainhira prosesu transportasaun materiál eleisaun ba terenu iha grupu joven balun iha área Uai-aca ho kondisaun lanu tenta provoka situasaun maibe parte seguransa kongese hakalma situasaun.

Purtantu, iha loron eleisaun 19 abríl mosu konfrontu tuda malu entre grupu joven iha área Teulale, Vila Antiga, Baucau maibé parte seguransa konsege kaptura no daudaun ne’e iha ona eskuadra Baucau vila hodi submete ba prosesu investigasaun.

“Durante ne’e insidente sira-ne’e mak mosu maibé laiha kazu ne’ebé grave mak akontese iha ámbitu eleisaun prezidensiál volta daruak, agora sei iha prosesu balun no relatóriu seidauk mai, bainhira konklui ona ita sei fó-sai ba publiku,” Superintendente António de Sá hateten.

Komandate PNTL Baucau agradese ba membru polísia na’in-30 hosi nasionál ne’ebé apoia ona serBisu seguransa durante realizasaun eleisaun prezidensiál volta daruak iha Baucau.

Jornalista    : Natalino Belo

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here