Funsionáriu STAE Baucau haloot urna rezultadu apuramentu munisipál ba karreta hafoin transporta ba nasionál, kuarta (20/04). Imajen Tatoli/Natalino Belo.

BAUCAU, 20 abríl 2022 (TATOLI) – Sekretariadu Tékniku Administrasaun Eleitorál (STAE) Munisípiu Baucau transporta ona urna sensitvu ba nasionál hafoin finaliza apuramentu munisípiu eleisaun prezidensiál volta daruak.

Diretór STAE Munísipu Baucau, Lúcio Freitas Salvador, esplika hafoin finaliza apuramentu iha tuku 03:21 dadeersan no rezultadu akta apuramentu hetan asinatura no fahe kedas ba fiskál, observadór nasionál no internasionál.

Maibé tanba kondisaun entaun STAE hamutuk ho fiskál kandidatura no observadór sira hamutuk deside deskansa antes transporta urna ba nasionál iha oras 14:00 meudia.

“Tuir ita-nia konkordánsia ho fiskál sira hafoin urna tau xave, entaun presiza fiskál sira-nia prezensa atu konfirma númeru xave antes transporta nasionál,” Diretór STAE Baucau hateten iha Vila Nova, kuarta ne’e.

Prosesu transportasaun urna sensitivu ba nasionál akoMpaña hosi funsionáriu STAE Baucau, Komisaun Nasionál Eleisaun (CNE, sigla portugés), fiskÁL kandidatu na’in-rua inklui hetan seguransa hosi membru Polisía Nasionál Timor-Leste (PNTL).

Rezultadu apuramentu munisípiu Baucau iha eleisaun prezidensiál volta daruak, kandidatu Prezidente Repúblika númeru sorteiu rua, Francisco Guterres ‘Lú Olo’ manán ho votu 45.985 (66,45%) no José Manuel Ramos Horta okupa segundu lugár ho votu 23.217 (33,55%).

Totál eleitór ne’ebé ezerse direitu votu iha eleisaun prezidensiál iha Baucau na’in-69.952 ho taxa partisipasaun 73,09% hosi totál votante 95.708, kompostu hosi votu nulu 524 (0,75%), reklamasaun 25 (0,04%), rezeitadu ida, abandonadu sia (0,01%),branku 191 (0,27%) nune’e totál votu válidu 69.202 (98,93%).

Notisia relevante: Lú Olo manán iha Baucau ho votu 45.985

Jornalista   : Natalino Belo

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here