Prezidente Repúblika,Francisco Guterres Lú Olo. Imajen Tatoli/António Gonçalves.

DILI, 19 abríl 2022 (TATOLI)—Prezidente Repúblika, Francisco Guterres Lú Olo, tersa ne’e, promulga Dekretu-Lei kona-ba atribuisaun subsídiu ba operadór transporte rodoviáriu públiku, aéro, marítimu nasionál no adkirente kombustível ba atividade agrikola no peska.

“Iha 13 abríl 2022, Konsellu Ministru aprova Dekretu-Lei ne’e hodi hatan ba folin kombustível ne’ebé sa’e tanba efeitu hosi funu iha Ukrania. Iha Dekretu-Lei ne’e hateten katak situasaun  akontese iha Ukrania provoka aumentu substansiál folin baril petroleu,  folin kombustível sa’e makaas ba konsumidór sira prejudika dezenvolvimentu atividade ekonómika País nian,” refere komunikadu imprensa ne’ebé Agência Tatoli asesu, hosi Palásiu Prezidensiál Ncolau Lobato, Bairru Pite, Dili.

Dekretu-Lei ne’e estabelese subsídiu finanseiru ho natureza esesionáll no tranzitória ho objetivu hamenus impaktu ekonómiku hosi folin kombustível ne’ebé sa’e, atribui ba operadór transporte  públiku sira no ba adkirente kombustível destinadu ba atividade agríkola no piskatória.

Subsídiu sei atribui liuhosi voucher kombustível ho montante korrespondente ho 100% hosi valór diferensa entre folin médiu hosi kombustível iha dezembru 2021 no folin kombustível ne’ebé aplika iha data emisaun voucher kombustível.

“Ho voucher kombustível ne’e se litru ida sa’e hosi $1 ba $1,25, Governu sei fó subsídiu sentavus 25,” nota ne’e hateten.

Jornalista : Nelson de Sousa

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here