Pasiente no profisionál saúde na’in-750 ezerse direitu votu iha HNGV
DILI, 19 abríl 2022 (TATOLI)— Pasiente no profisonál saúde na’in-750 ezerse ona nia direitu votu ho hakmatek iha Hospitál Nasionál Guido Valadares (HNGV).
Hafoin vota, pasiente Maria Viegas, husu kandidatu na’in-rua hanesan José Ramos Horta no Francisco Guterres Lú Olo atu kandidatu ne’ebé mak eleitu tenke ukun povu tomak no labele haree de’it ba povu balun.
“Ha’u nia esperansa ba kandidatura na’in-rua tanba sira mesak Timoroan de’it se mak manán mós ne’e ita nia Prezidente tenke ukun ba povu hotu la’ós ba grupu ida ka rua nia intrese de’it,” Pasiente Maria hateten ba Agência TATOLI, hafoin vota iha HNGV Dili, tersa ne’e.
Notísia relevante: Prizoneiru no Guarda Prizionál hahú ezerse direitu votu
Pasiente ne’e mós husu kandidatu ne’ebé mak manán hodi sai Xefe Estadu tenke realiza promesa ne’ebé durante kampaña fó sai ona ba povu atu aselera dezenvolvimentu iha nasaun ne’e.
Iha fatin hanesan, Mediku ne’ebé vota mós iha fatin votasaun movél ne’e, Pascoal Boavida Freitas hateten, kandidatu na’in-rua ne’e sé mak eleitu hanesan de’it importante lori nasaun ne’e ba oin.
“Sira na’in rua ne’e hanesan de’it ne’ebé mak manán sai Prezidente ba povu tomak atu lori nasaun ne’e ba oin,” nia dehan.
Ámbitu votasaun ne’e hala’o hahú iha tuku 07:00 no ramata iha 13:00 Otl, ne’ebé hetan seguransa másimu hosi Polisia Nasionál Timor – Leste (PNTL), Prokuradória Direitu Humanu Justisa (PDHJ), Komisaun Nasionál Eleiesaun (CNE-sigla Portugés) no hetan observadór internasionál no fiskál hosi kandidatu na’in-rua.
Notísia relevante: Eleitór na’in-393 vota iha HoREX Baucau
Jornalista: Hortencio Sanchez
Editór : Florencio Miranda Ximenes
