Komandante PNTL Munisípiu Dili, Superintendente Xefe, Henrique da Costa. Imajen Tatoli/Natalino Costa

DILI,19 abríl 2022 (TATOLI)— Komandante Polísia Nasionál Timor-Leste (PNTL), Munisipiu Dili, Superintendente Xefe, Henrique da Costa, informa Komandu PNTL sei foti medida hasoru membru hosi Unidade Batallaun Ordem Públika (BOP) ho inisál  TT, ne’ebé hala’o pistola ho tipu bloku 19 tarutu iha sentru votasaun Santa Cruz, postu administrativu Nain-Feto, Munisípiu Dili.

Insidente ne’e akontese maizumenus iha tuku 12:00, meudia, bainhira oknum PNTL ho inisiál TT atu ba ezerse nian direitu votu no entrega hela arma ne’e ba nia-kolega, hafoin vota nia  foti pistola hodi deskarega maibé derepente pistola ne’e tarutu. 

“Ita nia membru PNTL ne’e atu ba vota tuir regulamentu nia  tenke hasai kilat lai, ne’e duni nia fó hela nia kolega PNTL ida ne’ebé halo seguransa iha sentru votasaun hodi ka’er  no nia-tama ba sentru votasaun hodi vota. Maibe nia pistola ho tipu bloku 19 ne’ebe nia lori ne’e, iha hela posizaun fogu (karega) nia laran. Depois nia remata tiha vota nia fila fali mai simu pistola hosi nia kolega para hatama fila-fali ba nia-fatin. Maibé nia haree pistola pozisaun karrega, entaun nia tiru ba rai la’ós ho intensaun ruma. Hafoin kartus ida iha laran maka sai kona rai,” Superintendente Xefe, Henrique da Costa hateten ba Agência TATOLI, via teléfonika, tersa ne’e.

Nune’e, Komandu PNTL Dili relata ona ba Komandu Jerál PNTL atu foti medida hasoru membru PNTL ne’e.

“Ita relata ona ba iha Komadante Jerál no Komandu mós fó ona atensaun ba ida ne’e hodi foti medida ruma ba ita nian membru ne’e,” nia akresenta.

Ho insidente ne’e la rezulta buat ruma no situasaun kontinua laó hakmatek hodi komunidade kontinua ezerse nia direitu votu iha sentru votasaun refere.

“Laiha buat ruma ne’ebé akontese iha sentru votasaun, laiha buat seluk hanesan tuda malu iha sentru votasaun ne’eba. Tanba Eleitór sira ne’ebé marka prezensa iha ne’ebá ne’e, sira nafatin kontinua ba vota,” nia afirma.

Jornalista: Natalino Costa

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here