Brigada STAE verifika no halo pakotementu materiál eleisaun hodi distribui iha sentru votasaun iha iha postu lima iha Viqueque, kinta (14/04). Imajen TATOLI/Vitorino Lopes da Costa

VIQUEQUE, 14 abril 2022 (TATOLI)-Sekretariadu Tékniku Administrasaun Eleitorál (STAE) Viqueque akompaña ho Komisaun Nasionál Eleisaun (CNE, sigla portugés), kinta ne’e, hahú verifika no halo pakotementu ba materiál Eleisaun Presidensiál segunda volta tinan 2022.

“Ohin ita hahú pakotementu ba materiál sensitivu no la sentivu ne’ebé maka horiseik lori mai munisípiu Viqueque. Iha pakotementu ba buletin votu ami sei halo verifikasaun, karik buletin iha noda ruma, ita tau karimbu iha buletin votu atu labele implika fali ita-nia ofisiál sira iha sentru votasaun,” Diretór STAE munisípiu Viqueque, Humberto Fernandes, hateten ba Agência TATOLI, durante abertura atividade iha salaun apuramentu, administrasaun munisípiu Viqueque, kinta ne’e.

Notísia relevante: STAE Viqueque simu materiál kaixa 11 ba eleisaun prezidensiál segunda volta

Tuir Diretór STAE, buletin sira ne’ebé iha noda, ofisiál sira labele distribui ba eleitór sira no iha kontajen votu konsidera nulu.

“Iha fatin pakotementu ne’e ita bandu labele fuma no hemu bee iha laran. Tanba iha materiál sensitivu mak iha laran, ha’u hanoin regras maka hanesan ne’e, ita tenke kumpre,” nia akresenta.

Diretór STAE munsipál dehan, órgaun eleitorál hamutuk ho Polísia Nasionál Timor-Leste (PNTL) sei esforsu hodi eleisaun iha munisípiu Viqueque la’o susesu.

“Espera ita organiza eleisaun segunda volta ne’e ho di’ak hanesan Viqueque-oan, atu ema labele konta Viqueque nian naran, ita tenki kuida ida-ne’e,” nia tenik.

Atividade ne’e realiza hosi STAE durante loron-lima, hahú ohin, partisipa hosi ofisiál CNE, fiskál Kandidatu Prezidente Repúblika inklui membru Polísia.

Eleisaun Prezidensiál segunda volta iha Viqueque estabelese sentru votasaun 92 no estasaun votu 110.

Tuir dadus, númeru eleitór Eleisaun Prezidensiál 2022 iha munisípiu Viqueque hamutuk 58.421, kompostu hosi mane 29.675 (51%) no feto 28.746 (49%), partisipa eleisaun 43.252 (74,73%).

Iha eleisaun primeira volta iha loron 19 marsu iha munisípiu Viqueque, eleitór ne’ebé la partisipa eleisaun hamutuk 14.629, nune’e CNE esforsu hodi fahe informasaun liuhosi meiu komunikasaun hodi sidadaun sira  ne’ebé la partisipa eleisaun primeira volta bele partisipa fali.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here