Surtu dengue: pasiente sa’e ba 4.174 no mate nain-50
DILI, 13 abríl 2022 (TATOLI)—Diresaun Nasionál Saúde Públika liuliu Departamentu Vijilansia Epidemolojia iha Ministériu Saúde, hahú fulan-janeiru to’o horisehik, rejista pasiente dengue hamutuk no labarik na’in-50 mak mate.
“Situasaun kazu dengue iha Timor-Leste hosi janeiru mai too horiseik hamutuk kazu 4.174 no kumulativu óbitu na’in 50,” refere nota ne’ebé Agência TATOLI asesu, kuarta ne’e.
Maioria kazu ne’e deteta husi Munisípiu Dili ho totál 2.808, Baucau 251, Manatuto 172, Covalima 135, Ermera 118, Manufahi 167, Viqueque 69, Ainaro 45, Liquiça 113, Aileu 87 no Bobonaro 53, Lautem 153 no RAEOA lima.
Munisípiu Dili nafatin rejista kazu ne’ebe a’as iha hahu hosi fulan abril 2022 ho totál kazu 2.804, kompsotu hosi postu administrativu Dom-Aleixo iha 1.630, Cristo-Rei 454, Vera-Cruz 299 no Nain-Feto na’in-363.
Entretantu, Fasilidade saúde iha munisípiu Dili hanesan Hospitál Nasionál Guido Valadares (HNGV) rejista ona kazu dengue hamutuk 480, Klínika Fatumeta 268, sentru saúde Comoro 1.008, sentru saúde Vera-Cruz 204, sentru saúde Formoza 488, sentru saúde Becora 244, klinika Madre Eliza ida, sentru saúde Atauro 11, Sentru Saúde Metinaro 40, klínika Bairru-Pité 59 no klínika Motael na’in-rua no Klínika Moris Foun ida.
Nune’e, Ministériu Saúde kontinua apela ba populasaun iha Dili laran no mós iha Munisípiu sira seluk, atu aprezenta-an iha fasilidade públiku saúde (Sentru Saúde ka Ospitál) ne’ebé besik, bainhira sente isin-manas, ka senti laran sa’e,liman-ain no sikun moras hodi bele hetan atendimentu husi profisionál saúde sira.
Apela mós Autoridade Munisipál no Autoridade Lokál atubele orienta komunidade halo limpeza jerál iha suku no bairru sira liuliu fase tanke, bidon ka balde tau bee semana ida dal aida.
Hamoos sasán ka limpeza hanesan roda aat, vazu ai-funan atu susuk labele tau tolun, haloot ropa ho di’ak iha ita nia uma laran,uza ropa ne’ebé liman naruk karik toba iha tempu loron, uza aimoruk hanesan repelente ka autan, uza moskiteru karik toba iha tempu loron, so’e lixu iha nia fatin.
Notísia relevante: Surtu dengue: pasiente sa’e ba 4.148 no óbitu na’in-50
Jornalista : Felicidade Ximenes
Editór : Florencio Miranda Ximenes
