Ministru Edukasaun, Juventude no Desportu. Armindo Maia. Imajen TATOLI/Francisco Sony

DILI, 13 abril 2022 (TATOLI)—Profesór timor-oan na’in-219 ne’ebé Ministériu Edukasaun Juventude no Desportu (MEJD) rekruta iha tinan kotuk, daudaun hamutuk ho profesór portugés na’in-103, hanorin estudante 10.645 iha Eskola Referénsia Lian Portugés, Centros de Aprendizagem e Formação Escolar (CAFE).

“Ita iha planu no polítika tinan 2023 atu loke rekrutamentu ba profesór timor-oan sira ne’ebé iha abilidade no koñesimentu iha lian portugés atu reforsa profesór na’in-219 ne’ebé hanorin iha Eskola CAFE. Ita daudaun iha profesór hamutuk na’in-322 mak reforsa atividade ensinu aprendizajen iha Eskola Referénsia,” Ministru Edukasaun Juventude no Desportu, Armindo Maia hateten iha Palásiu Governu, kuarta ne’e.

Notísia relevante: MEJD sei konstrui edifísiu eskola CAFE haat ho millaun $4

Tuir Ministru, bainhira hakarak Eskola Referénsia sai di’ak liu, tenke aumenta tan profesór timor-oan ho koñesimentu di’ak iha lian portugés, nune’e labele dependénsia ba profesór portugés.

“Ho nune’e, gradualmente ba futuru kuandu la presiza tan profesór portugés sira, maka profesór timor-oan iha ona kapasidade atu hanorin,” nia akresenta.

Governu estabelese Eskola CAFE hamutuk 16 iha territóriu nasionál, kompostu hosi edukasaun Pre-Eskolár to’o Ensinu Sekundáriu Jerál, foin partisipa iha ezame nasionál dahuluk iha tinan kotuk.

“Sira hatudu rezultadu di’ak iha ezame nasionál. Ita bele dehan estudante Eskola CAFE hamutuk 50.000 resin partisipa iha ezame nasionál iha tinan kotuk,” nia tenik.

Projetu CAFE iha objetivu tolu hanesan proporsiona edukasaun públika ho kualidade ho uzu lian portugés ba ensinu disiplina hotu, proporsiona formasaun lian portugés ba universtáriu ne’ebé foin gradua no ba profosór foun sira inklui proporsiona formasaun no reforsa kapasidade profesór no administradór eskola públika lokál.

Jornalista : Tomé Amado

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here