Ministru Administrasaun Estatál, Miguel Pereira de Carvalho. Imajen TATOLI/Francisco Sony.

DILI, 13 abríl 2022 (TATOLI)—Ministru Administrasaun Estatál (MAE), Miguel Pereira de Carvalho, hateten Governu liuhosi MAE koordena ona ho Kámara Komérsiu Indústria Timor-Leste (CCI-TL, sigla posrtugés) sei fasilita transporte hodi transporta eleitór sira-ne’ebé hela iha Dili ba vota iha munisípiu.

Notísia Relevante: Governu prepara kamioneta 100 transporta eleitór sira vota iha munisípiu

“Governu laiha baze legál ida atu tula eleitór ba munisípiu hodi vota ba segunda volta maibé Governu halo koordenasaun ho Kámara Komérsiu Indústria atu transporta ita-nia eleitór sira ba ida-idak nia munisípiu,” Governante ne’e hateten ba jornalista sira, hafoin partisipa distribuisaun meterial sensitivu, iha STAE Caicoli, Dili, kuarta ne’e.

Iha koordenasaun ne’e, nia dehan, CCI-TL mak sei mobiliza ninia setór privadu sira-ne’ebé mak hakarak apoiu transporte ne’e hodi transporta votante sira-ne’e ba sira ida-idak ninia munisípiu.

“Ami kontaktu regulár ho CCI-TL no konfirma ona katak iha viatura bele to’o 100 maibé kona-ba despeza ne’e CCI-TL mak hatene no iha responsabilidade nune’e bele kontribui,” nia dehan.

Governante ne’e hateten, agora foka mak atu transporta eleitór ba munisípiu tanba importante mak ema goza ema-nia direitu votu atu vota iha eleisaun prezidensiál iha loron 19 abríl 2022.

Kona-ba asuntu ida-ne’e, kinta (14/04) aban, MAE sei halo konferénsia imprensa ida ba públiku katak oinsá lala’ok uza transporte hodi transporta eleitór sira ba sira ida-idak ninia Munisípiu.

Oráriu ba transporte ne’ebé mak atu transporta eleitór sira ba munisípiu hodi tuir eleisaun prezidensiál segunda volta iha 18 abríl ne’e sei hahú iha tuku 08h00 dadeer.

“Tuku 08h00 dadeer hahú konsentra ona iha fatin ne’ebé MAE identifika ona hanesan parte oeste sei halibur iha Tasi-Tolu, rai-klaran mak sei konsentra iha merkadu Taibessi no parte leste sei konsentra iha terminál Becora,” nia dehan.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here