Ahi han uma ida iha suku Suai Loro, aldeia Mane-ikun, Suai Villa, Covalima. Imajen Tatoli/Celestina Teles.

COVALIMA, 13 abril 2022 (TATOLI)—Akontesimentu inséndiu iha aldeia Mane Ikun, suku Suai Loro, postu administrativu Suai Vila, munisípiu Covalima iha tersa (12/4) tuku 23h00 kalan ne’ebé halo vítima la konsege salva nia sasán tanba deskonfia kauza hosi sirkuitu eletrisidade.

Vítima Lino de Jesus. Imajen Tatoli/Celestina Teles.

“Ha’u-nia sasán hotu iha uma laran, ahi han motuk hotu tanba iha akontesimentu ne’e ha’u laiha uma maibé ha’u ba hader ai-funan iha bairru-laran ne’ebé dook hosi uma maizumenus métru 100. Ha’u to’o iha uma ne’e, ahi han mutuk hotu ona sasán uma laran, ha’u salva de’it mak ha’u-nia motorizada,” Vítima Lino de Jesusu hateten ba Agência Tatoli iha fatin akontesimentu, iha Suku Suai Loro, Aldeia Mane-ikun, kuarta ne’e.

Ho akontesimentu refere, vítima rasik la deskonfia ema ruma mak sunu nia uma maibé nia deskonfia impaktu hosi sirkuitu eletrisidade ne’ebé halo nia labele salva ninia sasán hanesan mákina karpintária ho osan $4000-resin, dokumentu importante hanesan diploma no lisensa negosiu hosi SERVE, I.P.

Hafoin akontesimentu ne’e, nia deside hela provizóriu hamutuk no nia ama-ki’ik hodi hein apoiu emerjensia hosi Governu, hosi konstrui hikas ninia uma hodi hala’o fila-fali ninia atividade negósiu hanesan baibain.

“Ha’u husu ba Governu, ha’u presiza konstrui uma no apoiu osan, nune’e ha’u bele kontinua ha’u nia atividade negósiu hodi loke fali mobiliáriu,” nia husu.

Xefi suku Suai Loro, Martinho Mendonça esplika nu’udar líder komunitáriu sei relata relatóriu ba Governu nune’e vítima ne’e bele hetan apoiu emejensia hosi Governu.

Xefe Suku Suai Loro, Martinho Mendonça. Imajen Tatoli/Celestina Teles.

“Ha’u hanesan líder komunitáriu, relasiona akontesimentu refere ita la espera no agora ha’u rekolla ona dadus hodi hato’o ba Governu, nune’e vítima bele hetan apoiu emerjénsia Governu ho lalais,” nia informa.

Iha inséndiu ne’e, la rezulta ema ruma kanek no mate maibé bainhira akontesimentu ne’e mosu inséndiu komunidade sira mós kontaktu kedas Bombeiru hodi hamate ahi maibé la konsege  salva sasán uma laran.

 Jornalista : Celestina Teles

Editór        : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here