Prezidente Eletrisidade Timor-Leste, Empreza Publika (EDTL,E.P), Paulo da Silva, inaugura projetu eletrifikasaun nasional iha aldeia Helesu ba to'o area Nunudoi, suku Atabai, postu administrativu Atabae, munisípiu Bobonaro. Imajen Tatoli/Sérgio da Cruz.

BOBONARO, 12 abríl 2022 (TATOLI) – Uma-kain 162 iha suku Atabai ne’ebé lokaliza iha postu administrativu Atabae, munisípiu Bobonaro asesu ona enerjia elétrika.

Ministériu Obra Públika (MOP) liuhosi Eletrisidade Timor-leste, Empreza Públika (EDTL,E.P), tersa ne’e inaugura projetu liña eletrifikasaun nasionál media-tensaun hodi fó tán naroman ba komunidade uma-kain 162 iha aldeia Helessu to’o area Nunudoi, suku Atabai, postu administrativu Atabae, munisípiu Bobonaro.

Prezidente EDTL,E.P, Paulo da Silva. hateten projetu ne’e nu’udar kompromisu hosi VIII Governu ne’ebé lidera hosi Jenerál Taur Matan-Ruak nian tanba molok mandatu remata suku hotu-hotu iha territóriu nasionál tenke asesu hotu enerjia eletrisidade.

“Ha’u hato’o parabéns ba Atabae ona sira tanba agora asesu ona eletrisidade nia naroman, maibé ha’u husu nafatin atu poupa enerjia. Kuandu iha tempu loron bainhira laiha nesesidade taka tiha, tanba kuandu loron mak ita loke nafatin ahi, ita obriga mákina serbisu maka’as liután no nia aat ita-nia gastu mós barak,” nia apela ba komunidade.

Nia agradese kompañia implementadór, líder komunitária no komunidade sira -ne’ebé durante tau matan ba prosesu ne’e hahú kedas ninia implementasaun to faze fornesimentu.

Hafoin fornesimentu enerjia ne’e, EDTL sei fó espasu ba komunidade sira utiliza gratuita durante fulan-neen, maibé liu ida-ne’e tékniku sira sei instala preparagu atu kontrola utilizasaun enerjia ho loloos.

Reprezentante Prezidente Autoridade Munisípiu Bobonaro, Gisela Pires apresia ho programa governu nian maske hasoru situasaun pandemia Covid-19 no impase polítika maibé konsege implementa projetu ne’e hodi hasai povu hosi nakukun.

“Ida-ne’e mak ita-nia estadu halo atu dignifika ninia povu, ne’e duni ba veteranu, joven no populasaun sira tomak atu nafatin kontribuisaun nafatin ba EDTL, nune’e funsionamentu mákina estadu bele la’o atubele dezenvolve ita-nia rai ba oin,” nia katak.

Xefe suku Atabai, Paulino Mali-Bere, agradese Ministériu Obra Públika no Eletrisidade Timor-Leste, tanba lori ona naroman ba komunidade ne’ebé mak durante tinan 20 resin ona halerik ba enerjia elétrika.

“Ami sente kontente tanba dentru de tinan 2021 oportunidade mai suku Atabai hetan iha fatin rua kedas iha iha diresaun Vila Maria, Lolo-Colo to’o Saburapo depois aumenta tán ida-ne’e, agora prepara atu kontinua tán, ne’ebé ami hotu sente orgulu tanba governu nunka haluha ami hodi responde ona ami-nia prokupasaun,” nia agradese.

Projetu ne’e responsabiliza hosi empreza Mota-Loes Unipesoal Lda konsórsiu ho kompañia Rarilivos Unipesoal Lda ho kustu $355,364.82 ho durasaun kontratu fulan tolu no distánsia kilómetru hitu.

Enkuantu suku Atabai iha área luan kilómteru 34,5, hosi parte oeste baliza ho suku Hataz, norte baliza ho suku Rairobu no parte súl baliza ho postu administrativu Cailaco.

Suku Atabai iha aldeia lima mak hanesan, Fatubesi, Lolo-Colo, Helesu, Saburapo no Madebau, no totál abitante 2,753 kompostu hosi mane 1.358 no feto 1.395 ho totál uma-kain 599.

Jornalista : Sérgio da Cruz
Editór : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here