DILI, 12 abril 2022 (TATOLI)—Grupu Foo Hau Kiun (FHK) semana kotuk ne’e, importa ona manu-tolun kontentór ida hosi Malázia, hodi atende nesesidade konsumidór rai-laran.
“Realidade semana ida liubá manu-tolun susar duni, maibé ami koko buka dalan no semana kotuk ne’e ami hatama ona manu-tolu hosi Malázia kontentór ida, ninia kuantidade kaixa 900 ba empakotementu boot karik 10.800,” Koordenadór Jerál FHK, Pascoal Suri Mali, hateten, ba Agência TATOLI, iha ninia knaar fatin, Leader, tersa ne’e.
Notísia relevante: MTKI halo monitorizasaun ba folin mina-sona sa’e iha merkadu nasionál
Folin empakotementu kiik enxe manu-tolun 10 ho folin $1,95 no empakotementu boot enxe manu-tolun 30 ho folin $5,25.
“Ami-nia loja sira ne’ebé fa’an manu-tolun hanesan Leader, Lita Store, Lisun, no seluk tan, folin hanesan de’it,” nia akresenta.
Daudaun ne’e, FHK halo ona koordenasaun ho Ministériu Agrikultura no Peska (MAP) hamutuk ho kuarentena atubele importa manu-tolun hosi Indonézia atu antisipa situasaun iha rai-laran.
“Antes ne’e ita-nia lei kuarentena la fó dalan atu importa sasán hosi Indonézia mai, maibé ikus mai ami koko ko’alia ho sira, ne’ebé iha tempu badak manu-tolun sei to’o mai, tanba karta autorizasaun sai ona,” nia tenik.
Aleinde ne’e, FHK sei importa tan manu-tolun empakotementu boot hamutuk 2.400 hosi Indonézia.
Jornalista : Arminda Fonseca
Editora : Julia Chatarina
