Komandante Komponente terrestre foun, José da Costa ‘Trix’ asinatura nota hafoin simu pose iha Komponente Terrestre Baucau, segunda (11/04). Imajen Tatoli/Natalino Belo.

BAUCAU, 11 abríl 2022 (TATOLI) – Xefe Estadu Maiór FALINTIL-Forsa Defeza Timor-Leste (F-FDTL), Tenente Jenerál Domingos Raul ‘Falur Rate Laek’ segunda ne’e fó pose ba Koronél José da Costa ‘Trix’, lidera Komponente Terrestre.

Komandu F-FDTL fó pose ba Koronél José da Costa ‘Trix’ nu’udar komandante Komponente Terrestre hodi substitui komandante sesante Tenente Koronél Renilde Cortereal e Silva.

Xefe Estadu Maiór Jenerál F-FDTL, Tentente Jeneral Falur Rate Laek, hateten serimónia pose ne’e loloos organiza hosi Prezidente Repúblika, Francisco Guterres Lu Olo maibé tanba razaun kampaña eleitóral nune’e delega casa militár mak organiza pose ba komandante komponente terrestre.

Komandante Komponente Terrestre Sesante, Tenente Koronél Renilde Cortereal e Silva, Komandante Komponente Terrestre foun F-FDTL, José da Costa ‘Trixi’ no Xefe Estadu Maiór Jenerál F-FDTL, Tenente Jenerál, Falur Rate Laek, foto hamutuk iha Komponente Terrestre Baucau, segunda (11/04). Imajen Tatoli/Natalino Belo.

Komandu F-FDTL kongratula ba Koronél ‘Trix’ ne’ebé assume nu’udar komandante komponente terrestre no fó konfiansa tomak hodi kontinua obra sira-ne’ebé mak komandante sira seluk hala’o ona.

“Komandu FALINTIL-FDTL fó konfiansa tomak ba ita-boot atu lidera no komanda komponente ida-ne’e ho di’ak no profisionál,” Xefe Estadu Maiór Jenerál F-FDTL hateten iha komponente terrestre Baucau.

Falur akresenta, komandante komponente terrestre foun ho postu koronél maibé iha karreira naruk durante envolvementu iha F-FDTL.

Tenente jenerál Falur konsidera komponente terrestre importante ba Forsa Armada tanba sai komponente opersaionál tuir sistema no lei defeza nasionál, estatutu F-FDTL no defini iha dokumentu sira seluk hanesan konseitu estratéjiku defeza no seguransa, militár no misaun F-FDTL.

Dezisaun refere bazea ba dekretu governu 13/2022 ne’ebé públika hosi Prezidente Repúblika iha loron 6 fulan-marsu, no bazea ba estatutu F-FDTL, artigu 4 dekretu lei númeru 5/2022 loron 19 janeiru defini estrutura sentrál F-FDTL.

Dekretu lei númeru 33/2020 loron 2 setembru kona-ba estatutu militár foun F-FDTL, artigu 93 númeru 1, katak komandante komponente sira nomea hosi Prezidente Repúblika bazea ba proposta hosi governu.

Númeru rua hosi refere hatete serbisu ezersísiu kargu komandante komponente durasaun tinan-rua no bele estende másimu tinan-ida.

Hafoin simu tiha proposta hosi governu, Prezidente Repúblika realiza enkontru Konsellu Superiór Defeza no Seguransa (CSDS, sigla portugés) iha loron 22 fevereiru 2022 no dekreta ezenorasaun Komandante Terrestre atuál Tenente Koronél, Reinaldi Cortereal e Silva no nomea Koronel José da Costa Soares ‘Trixi’ nu’udar komandante terrestre foun.

Jornalista    : Natalino Belo

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here