Populasaun simu Prezidente Partidu CNRT, Xanana Gusmão, molok halo kampaña tipu diálogu ba Kandidatu PR, José Ramos Horta, iha postu administrativu Hatulia B, sesta (08/04). Imajen TATOLI/Jogerjo Guterres

ERMERA, 08 abril 2022 (TATOLI)–Prezidente Partidu Congresso Nacional de Reconstrução de Timor (CNRT), Xanana Gusmão, husu ba partidu aliadu sira hodi serbisu maka’as lori vitória ba kandidatu Prezidente Repúblika (PR), ho númeru sorteiu 01, José Ramos Horta, iha liuhosi eleisaun segunda volta.

Prezidente Partidu CNRT, Xanana Gusmão. Imajen TATOLI/Jogerjo Guterres

“Husu ba partidu polítiku no movimentu sira ne’ebé mai hamutuk ho CNRT hodi apoia kandidatu Ramos Horta, atu serbisu hamutuk no serbisu maka’as, la’o nafatin door to door, hodi nune’e ita-nia kandidatu bele manán iha eleisaun agora,” Xanana apela, durante halo kampaña apoiu kandidatura Horta ho tipu diálogu, iha postu administrativu Hatulia B, munisípiu Ermera, sesta ne’e.

Notísia relevante: Kampaña iha Manatuto, Horta hakarak promove produtu lokál ba investidór estranjeiru

Ámbitu kampaña tipu diálogu ba Kandidatu PR, José Ramos Horta, iha postu administrativu Hatulia B, sesta (08/04). Imajen TATOLI/Jogerjo Guterres

Partidu polítiku sira ne’ebé daudaun apoia Kandidatu PR, Ramos Horta mak hanesan Partidu Demokrátiku (PD), Partidu Sosialista Timorense (PST), Partidu Unidade Dezenvolvimentu Demokrátiku (PUDD), Asosiasaun Sosiál Demokrata Timorense (ASDT), Partidu Demokrátiku Kristaun (PDC, sigla portugés) inklui movimentu sira.

Xanana Gusmão dehan, Ramos Horta la’ós militante CNRT, maibé partidu rasik hili nia tanba hakarak haúr didi’ak Konstituisaun.

“CNRT hili Ramos Horta sai Prezidente Repúblika hodi hatúr fali Konstituisaun Repúblika Demokrátika Timor-Leste (RDTL) iha ninia fatin. Kuandu lei inan ida ema la respeita ona maka lei oan sira la vale ona, Konstituisaun iha ita-nia Estadu,” Xanana kestiona.

Prezidente Partidu CNRT, Xanana Gusmão, simu malus hosi inan-feton iha ámbitu kampaña tipu diálogu ba Kandidatu PR, José Ramos Horta, iha postu administrativu Hatulia B, sesta (08/04). Imajen TATOLI/Jogerjo Guterres

Líder nasionál ne’e konsidera iha kampaña prezidensiál segunda volta tanba ho prezensa partidu polítiku barak, maka Horta la’ós de’it kandidatu CNRT nian maibé ba ema hotu.

“Horta kandidatu hosi partidu CNRT ikus mai mosu partidu no movimentu seluk iha segunda volta. Ita kria unidade nasionál ida iha momentu ida-ne’e atu salva nasaun iha demokrasia, ita la’ós fahe malu idaidak ho ninia hanoin, maibé to’o iha faze ne’ebé nasaun presiza tebes ita, ita hotu ho hanoin ida de’it, hakarak ida de’it no neon ida de’it maka ita hamutuk. Horta la’ós kandidatu CNRT nia maibé hotu-hotu ne’ebé halibur-an iha segunda volta ne’e sira-nia kandidatu hotu, sira haka’as-an serbisu ne’e tanba hakarak salva ita-nia nasaun,” nia dehan.

Husu apoiante labele provoka apoiante advesáriu

Populasaun simu Prezidente Partidu CNRT, Xanana Gusmão, molok halo kampaña tipu diálogu ba Kandidatu PR, José Ramos Horta, iha postu administrativu Hatulia B, sesta (08/04). Imajen TATOLI/Jogerjo Guterres

Iha sorin seluk, líder másimu CNRT husu ba apoiante kandidatu Horta atu labele halo provokasaun hasoru apoiante adversáriu, nune’e mós bainhira hetan provokasaun hosi ema seluk labele simu hasoru.

“Ha’u rona katak koordenadór PD nian ema sona, tanba ne’e ita hotu kuidadu, labele tauk maibé labele simu ema-nia provokasaun, labele provoka hasoru, no tenki hatudu maturidade polítika,” nia fó hanoin.

Populasaun simu Prezidente Partidu CNRT, Xanana Gusmão, molok halo kampaña tipu diálogu ba Kandidatu PR, José Ramos Horta, iha postu administrativu Hatulia B, sesta (08/04). Imajen TATOLI/Jogerjo Guterres

Kandidatu PR iha primeira volta, Hermes da Rosa Correia Barros, ne’ebé fó mós apoiu ba Horta iha etapa ne’e, husu ba apoiante sira, liuliu hirak ne’ebé iha eleisaun antes ne’e apoia nia, atu iha loron eleisaun bele hakbesik-an ba sentru votasaun hodi vota ba Ramos Horta.

“Iha loron 19 abril kuandu hader mai, hemu tiha kafé manas no hakat ba sentru votasaun hodi ba deside votu ne’e ba hotu kandidatu númeru 01. Tanba ita hakarak rai ida (Timor-Leste) ba di’ak, mestre mak Xanana Gusmão ne’ebé deside apoiu totál Ramos Horta,” nia hameno.

Populasaun husu hadi’ak infraestrutura bázika   

Populasaun postu Hatulia B deside sei vota ba Ramos Horta maibé tenki tau-matan no hadi’a infraestrutura bázika.

“Ami deside hili Ramos Horta sai Prezidente Repúblika, maibé karik eleitu presiza haree netik ami-nia estrada sira hodi ami lori aifuan no kafé ne’ebé ami kuda ba fa’an, nune’e mós koopera ho Governu sosa netik ami-nia sasán sira hodi ami bele hetan netik osan oituan,” Abitante Hatulia B, Egidio Carvalho (apoiante), dehan.

Nune’e mós, Abitante iha fatin hanesan, Manuel Marçal da Silva (apoiante), husu mós ba Kandidatu Ramos Horta, karik eleitu bele tau-matan ba igreja.

“Karik sai Prezidente hadi’a netik ami-nia igreja ne’ebé daudaun harii hela besi, maibé seidauk bele realiza. Ami Hatulia B prontu fó ami-nia votu,” nia promete.

Durante diálogu hetan supervizaun hosi Komisaun Nasionál Eleisaun (CNE, sigla portugés), observadór internasionál no hetan seguransa hosi Polísia Nasionál Timor-Leste (PNTL).

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here