MEJD entrega kadeira a’at 256 ba Eskola ESTV-GTI halo reparasaun

DILI, 08 abril 2022 (TATOLI)—Ministériu Edukasaun Juventude no Desportu (MEJD) liuhosi Diresaun Nasionál Ensinu Sekundáriu Tékniku Vokasionál (DNESTV), sesta ne’e, entrega kadeira a’at hamutuk 256 ba Eskola Ensinu Sekundáriu Tékniku Vokasionál – Grupu Teknolojia Indústria (ESTV-GTI) Becora hodi halo reparasaun.

Diretór Nasionál Ensinu Sekundáriu Tékniku Vokasionál, Augusto Pereira entrega simbólikamente kadeira a’at ba Diretór Eskola Ensinu Sekundáriu Tékniku Vokasionál Becora, Francisco Guterres, hodi estudante sira halo reparasaun, iha resintu eskola, sesta (08/04). Imajen TATOLI/Tomé Amado

Diretór Nasionál Ensinu Sekundáriu Tékniku Vokasionál, Augusto Pereira, hateten, diresaun rekolla kadeira a’at iha eskola sira hodi entrega ba estudante iha ESTV GTI Becora atu halo fali reparasaun.

“Inisitiva ne’e atu apoiu kapasitasaun estudante sira iha programa prátika,” Diretór hateten iha ninia knaar fatin MEJD, Villa-verde.

Notísia relevante: Governu Sei Sosa Kadeira 54.000 Ba Eskola Sira

Aleinde ne’e, bainhira ministériu loke konkursu, kustu hadi’a ba kada kadeira $60, maibé liuhosi estudante tékniku vokasionál sira-nia tulun, bele hadi’a ho kustu kiik no kadeira a’at la soe.

MEJD foin implementa programa ne’e ba dahuluk, nune’e fó biban ba estudante halo prátika hodi aumenta kapasidade.

Estudante Eskola Ensinu Sekundáriu Tékniku Vokasionál Becora hahú prátika reparasaun kadeira, iha resintu eskola, sesta (08/04). Imajen TATOLI/Tomé Amado

“Ita halo ida-ne’e atu estudante sira bele hetan prátika barak liu hodi manán esperiénsia. Tanba polítika ida-ne’e bele apoiu ona estudante sira bainhira sira termina mós ho sentimentu orgullu tanba kualifikadu iha área relevante,” nia akresenta.

Nune’e, parte diresaun sei rekolla hikas bainhira estudante sira halo ona reparasaun kadeira 256, hodi entrega ba Servisu Edukasaun Munisípiu Dili hodi sira rasik mak jere.

“Bainhira eskola rua ne’e kadeira seidauk sufisiente bele distribui ba sira,” nia tenik.

Estudante sira iha Eskola Ensinu Sekundáriu Tékniku Vokasionál Becora simu orientasaun hosi parte MEJD no Diretór Eskola hodi halo prátika reparasaun kadeira, iha resintu eskola, sesta (08/04). Imajen TATOLI/Tomé Amado

Iha biban hanesan, Diretór Eskola Ensinu Sekundáriu Tékniku Vokasionál Becora, Francisco Guterres, hateten, estudante sira daudaun halo hela serbisu reparasaun ba kadeira a’at sira ne’e tanba konsidera parte ida hosi programa ekstrakurrikulár.

“Reparasaun ba kadeira a’at sira ne’e sei iha tempu loron-20 de’it kuandu laiha difikuldade, maibé agora kestaun ida maka eskola laiha apoiu finanseiru atu hola gurinda no tinta sira. Ami komunika ona ba parteministériu hodi haree asuntu ne’e,” nia dehan.

Jornalista : Tomé Amado

Editora : Julia Chatarina