Badaen sira hahú kesi besi ba konstrusaun projetu komunitária Eskola Bázika Filiál (EBF) Oplegul, suku Holsa, postu administrativu Maliana, munisípiu Bobonaro. Imajen Tatoli/Sérgio da Cruz.

BOBONARO, 08 abríl 2022 (TATOLI) – Grupu komunitária hahú implementa konstrusaun  Ensinu Bázika Filiál (EBF) Oplegul, suku Holsa, postu administrativu Maliana, munisípiu Bobonaro ne’ebé tama iha projetu komunitária hosi Ministériu Edukasaun, Juventude no Desportu (MEJD) ho totál kustu $77.033,02.

Konstrusaun foun ba eskola ho sala aula haat ne’e hahú implementa iha loron 22 fulan-fevereiru ne’e no daudaun ne’e progresu fíziku atinje ona 15% tanba to’o ona prosesu hatuur besi-rin no kesi sinta okos.

“Ami sente kontente tanba Ministériu Edukasaun, Juventude no Desportu tau ona prioridade halo kontrusaun foun ba ami-nia eskola ne’ebé tinan barak ona nia kondisaun aat tebes, fiar katak ho eskola foun ne’e estudante sira bele hetan edukasaun ho kualidade iha fatin ne’ebé dignu,” Koordenadór EBF Oplegul, Filomeno Saik-Besin Soares, informa ba Tatoli, iha kna’ar fatin, sesta ne’e.

Nia observa traballadór komunitária sira badinas tebes aselera serbisu, maibé  tanba seidauk hetan orientasaun hosi enjiñeiru nasionál atu ezekuta projetu ne’e tuir dezeñu no BOQ entaun obra refere atraza, nune’e foin lalais ne’e mak hahú fali.

EBF Oplegul konstrui dezde 2009 tama iha Projetu Pakote Referendu (PPR) ho tipu semí-permanente, kompleta ho sala aula tolu inklui sala aula tolu didin de’it ho bebak akumula estudante hosi primeru to’o sestu-anu hamutuk 150.

“Ami laiha kompeténsia atu obriga grupu komunitária sira aselera serbisu, maibé ami fiar katak projetu ne’e sei finaliza tuir kontratu ho durasaun fulan-neen, atu nune’e ami-nia estudante sira bele tuir prosesu apredizajen iha eskola foun no permanente tanba eskola atuál kondisaun aat loos ona,” nia akresenta.

Ekuantu Ministériu Edukasaun, Juventude no Desportu (MEJD) prevee $2.409.512,03 iha tinan ne’e sei hadi’a eskola 21 ho sala aula 76 iha munisípiu Bobonaro ne’ebé tama iha projetu komunitária.

Tuir rekizitu, eskola sira atu hahú prosesu iha faze dahaat, hahú hosi prosedimentu ba konstrusaun ne’e kada eskola sei foti uluk fundu 25%, hafoin kompleta tiha mak sei foti tán 75% hodi bele kompleta 100%.

Entretantu Eskola 21 iha Bobonaro ne’ebé tama projetu komunitáriu mak hanesan EPE Atu-Aben, EPE Rita-bou, EPE Holsa, Ensinu Báziku Sentrál (EBC,sigla portugés) Gumer, EBC Hauba, Ensinu Báziku Filiál (EBF) Dilai.

Nune’e mós EBF Kota Boot, EBF Mazop, EBF Odelgomo, EBF Oplegul, EBF Boloi, EBF Cara-bau, EBF Ana-pal, EBF Maliubu, EBF Ferik Katuas, EBF Molop-Taz, EBF Opa Vila, EBF Halekou,  EBF Rairobo, EBF Marco no ESJ Maliana.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here